WEKENI MIKAKATI MADHUBUTI KUDHIBITI MAAMBUKIZI MAPYA YA UKIMWI: RC NDIKILO

Posted on: December 1st, 2020

Mkuu wa Mkoa wa Pwani, Mhe Eng Evarist Ndikilo amewataka Viongozi na Wadau mbalimbali Mkoani Pwani kuweka Mikakati madhubuti  kupambana na kushusha maambukizi ya VVU Mkoani hapo.

Ametoa agizo hilo Desemba 1,2020 wakati wa maadhimisho ya Siku ya UKIMWI  Duniani yalifanyika kimkoa Wilayani Bagamoyo katika Viwanja vya Shule ya Msingi Majengo.

Akizungumza na Wanachi hao Ndikilo amesema Takwimu zinaonesha kiwango cha maambukizi Kimkoa Kimepungua kutoka asilimia 5.9 mwaka 2012 hadi asilimia 5.5 mwaka 2017. "Maambukizi yamepungua ingawa bado tupo juu ya Wastani wa kitaifa ukilinganishe  na kile cha Taifa cha asilimia 4.7"

Ndikilo ametaja Halmashauri ya Kibaha Mji, Mkuranga na Chalinze kuonekana kuwa na maambukizi mengi kutokana na uwepo wa Shughuli nyingi za mwingiliano wa kiuchumi.

Akisisitiza Upimaji wa Hiari  Ndikilo amesema Idadi kubwa ya wanaopima ni Wanawake  ukilinganisha na Wanaume. Amewataka wanaume kuacha uoga wa kupima VVU.Aidha, Amewataka Waishio na Virusi vya UKIMWI  wasibweteke na kufubazwa kwa  VVU na kuanza  mienendo isiyofaa." Naomba muendelee kufuata maelekezo ya wataalamu ili kulinda afya zenu"

Akitaja Changamoto zinazochochea mapambano dhidi ya  VVU Mkoani hapo Ndikilo ametaja  kuwa ni pamoja na Ndoa za utotoni, kuwepo kwa vituo vya maegesho ya malori kwenye barabara kuu,  ulevi  uliopindukia, ngoma za usiku (Vigodoro), kuwepo kwa biashara ya Ngono, ikiwemo vigodoro, "hizi ni miongoni mwa changamoto zinazokwamisha juhudi za mapambano dhidi ya UKIMWI.

Ndikilo ametoa wito kwa wadau mbalimbali  wanaoshughulika na Masuala ya Udhibiti wa UKIMWI kuendeleza mapambano, ikiwemo Halmashauri kuwa na Sheria ndogo za kudhibiti sherehe na shughuli mbalimbali zenye viashiria vya UKIMWI.

Maadhimisho ya Siku ya UKIMWI Duniani kwa Mkoa wa Pwani yamefanyika leo Disemba 1, 2020 Wilayani Bagamoyo yakiongozwa na Mkuu wa Mkoa wa Pwani Mhe. Mhandisi Evarist Ndikilo aliyekuwa Mgeni rasmi.