25,319 TAYARI WAMEANDIKISHWA KATIKA DAFTARI LA KUDUMU LA WAPIGA KURA BAGAMOYO

Posted on: February 18th, 2020

Wananchi takribani 25,319, wamejitokeza kwenye zoezi la uandikishaji Wananchi katika daftari la kudumu la wapiga kura  mpaka sasa.

Akizungumza katika Mkutano maalum wa Baraza la waheshimiwa madiwani, unaofanyika katika Ofisi za Halmashauri, Kaimu Mkurugenzi wa Halmashauri ya Wilaya ya Bagamoyo, ndg. Julius Mwanganda amesema, mwitikio wa Wananchi katika zoezi la uboreshaji daftari la kudumu la wapiga kura, ni mkubwa na zoezi linaendelea vizuri.

“Hali ya uandikishaji wananchi kwenye daftari la kudumu la wapiga kura ni nzuri, kwani Wananchi wamejitokeza kwa wingi katika Kata zote 11 za Halmashauri ya Wilaya ya Bagamoyo, na hadi sasa jumla ya Wananchi 25,319 wameshajiandikisha na kupatiwa vitambulisho vya mpiga kura”

Anaongeza, natoa wito kwa Wananchi wote ambao bado hawajafika katika vituo vya uandikishaji, wajitokeze kujiandikisha, kwani zoezi hili lililoanza Tarehe 14/02/2020, linatarajiwa kukamilika tarehe 20/02/2020, hivyo wahakikishe wanautumia muda uliobaki vizuri, kwa kufika vituoni na kujiandikisha ili waweze kupata fursa ya kutumia haki yao ya kikatiba ya kupiga kura kwenye uchaguzi ujao wa Waheshimiwa Madiwani, Wabunge na Rais utakaofanyika Mwishoni mwa mwaka huu.