BAGAMOYO WAANZA UTEKELEZAJI WA AGIZO LA MAKAMU WA RAIS

Posted on: December 7th, 2018

Halmashauri ya Wilaya ya Bagamoyo imeanza kutimiza agizo la Makamu wa Rais wa Jamhuri ya Muungano wa Tanzania, Mhe. Samia Suluhu Hassan, la kuhakikisha Wananchi wa Bagamoyo, hasa vikundi vya wajasiriamali wanawake na vijana wananufaika na mradi mkubwa wa ufugaji wa kuku wazazi toka kampuni ya AKM glitters iliyopo Kitongoji cha Yombo.

Katika kulisimamia na kutimiza agizo hilo, Ofisi ya Mkurugenzi wa Halmashauri ya Wilaya ya Bagamoyo kupitia Idara ya Maendeleo ya jamii, kwa kushirikiana na kampuni ya AKM glitters, imefanya mafunzo maalum ya siku mbili, kwa viongozi wa vikundi 8 vya wanawake, vinavyojishughulisha na ufugaji wa Kuku, na kuwapa elimu juu ya ufugaji bora wa kuku wazazi na namna watakavyonufaika na mradi huo ambao kwa sasa unatekelezwa na kampuni ya AKM glitters.

Akizungumza wakati wa mafunzo hayo yaliyofanyika katika Ukumbi wa Halmashauri, Mkuu wa Idara ya amendeleo ya jamii, Ndg. Julius Mwanganda amesema, wanatarajia baada ya mafunzo hayo, vikundi shiriki kuanza ufugaji wa kuku wazazi watakaopewa na kampuni ya AKM glitters, na kila kikundi kitawezeshwa kuku 500 kwa kuanzia, huku nusu ya gharama za kununua kuku hao ikilipwa na Halmashauri kwa vikundi vitakavyokuwa na sifa, kupitia uwezeshwaji wa asilimia 10 ya mapato ya ndani ya mikopo inayotolewa kwa Wanawake na Vijana.

“Tumezungumza na kampuni ya AKM glitters inayojishughulisha na ufugaji wa kuku wazazi huko Yombo, na wamekubali kushirikiana na Halmashauri, kuwezesha vikundi vya wanawake wanaojishughulisha na ufugaji wa Kuku, Kampuni ya AKM itatoa punguzo kwa wanavikundi la asilimia 10, huduma za ugani, chakula cha kuku kwa mwezi mmoja na vyombo vya kulishia kuku, huku Halmashauri ikiwawezesha wanavikundi hao nusu ya gharama ya ununuzi wa vifaranga vya kuku wazazi toka kampuni ya AKM glitters” Amesema Ndg. Mwanganda.

Baada ya kukamilika kwa mafunzo ya ufugaji bora wa kuku wazazi, yaliyoendeshwa kwa siku mbili kwa wanavikundi wanawake, Ofisi ya Mkurugenzi wa Halmashauri kwa kushirikiana na kampuni ya AKM wamefanya ziara ya kuvitembelea vikundi vyote 8 ili kujiridhisha kama vikundi hivyo vinakidhi vigezo vya kupatiwa msaada huo.

Agizo la kusimamia na kuhakikisha Wananchi wa Halmashauri ya Wilaya ya Bagamoyo hususani Vikundi vya Wanawake vinanufaika na mradi wa kuku wazazi unaoendeshwa na kampuni ya AKM glitters iliyopo Yombo, lilitolewa na Makamu wa Rais wa Jamhuri ya Muungano wa Tanzania, Mhe. Samia Suluhu Hassan, alipokuwa katika ziara ya kutembelea shughuli za maendeleo zinazotekelezwa na Serikali na wadau mbalimbali wa maendeleo katika Halmashauri ya Wilaya ya Bagamoyo, ambapo katika ziara hiyo pia alitembelea mradi wa kuku wazazi unaoendeshwa na kampuni ya AKM glitters uliopo Kata ya Yombo. Ziara hiyo ilifanyika mwishoni mwa Mwezi wa kumi, mwaka huu 2018.