BAGAMOYO YAFANIKIWA KUJENGA OFISI MPYA ZA KISASA ZA KATA

Posted on: April 24th, 2018

Halmashauri ya Wilaya ya Bagamoyo imefanikiwa kujenga ofisi mpya na bora za Kata katika Kata zake zote ndani ya Halmashauri hiyo.

Kata ambazo hazikuwa na Ofisi za kisasa, zilitengewa fedha katika bajeti yam waka wa fedha 2017/2018 toka mapato ya ndani kiasi cha Shilingi za Kitanzania Milioni 10 kila Kata, ambazo zilitumika kuanza ujenzi wa Ofisi hizo.

Ofisi hizo za kisasa za Kata sasa zitakuwa na uwezo mkubwa wa kutoa huduma kwa Wananchi kwa ukaribu na kwa urahisi zaidi kwani zitakuwa na wataalamu watakao hudumia Wananchi moja kwa moja kwenye Kata, wakiwemo Maafisa Ugani wa Kata, Maafisa maendeleo ya jamii wa Kata, Maafisa Afya wa Kata, na Afisa mtendaji wa Kata.

Nae Makamu Mwenyekiti wa Halmashauri Mhe. Said Ngatipula akizungumza mapema jana wakati wa Ziara ya kamati hiyo ilipokuwa ikikagua miradi ya maendeleo inayotekelezwa na Halmashauri, amesema ”Nimefurahishwa sana na namna ambavyo ujenzi wa Ofisi hizi za Kata unavyoendelea lakini niwaombe Watendaji wa Kata ambazo zinaendelea na ujenzi kuwa wabunifu zaidi kwa kutafuta wadau ndani na nje ya Kata zao ambao watachangia juhudi za Halmashauri na Wananchi ili Ofisi hizo zikamilike na kuanza kutoa huduma kwa Wananchi”

Ujenzi wa Ofisi za Kata unaendelea katika Kata za Makurunge, Nia njema, Kisutu na Magomeni ambapo kote upo katika hatua za Ukamilishaji.