BAGAMOYO YAZINDUA CHANJO YA SARATANI YA SHINGO YA KIZAZI

Posted on: May 1st, 2018

Halmashauri ya Wilaya ya Bagamoyo  imefanya zoezi la uzinduzi wa chanjo ya Saratani ya mlango wa kizazi (HPV) kwa Wasichana wenye umri wa miaka 14 Wilayani humo.

Uzinduzi huo umefanyika katika kliniki ya mama na mtoto iliyopo katika Hospitali ya Wilaya ya Bagamoyo mapema asubuhi ya Aprili 30, 2018.

Chanjo hiyo ambayo ni endelevu inawalenga watoto wa kike wote wenye umri wa miaka 14 pamoja na wale waliofikisha umri huo katika kipindi cha mwezi Machi na Aprili mwaka huu.

Akizindua zoezi hilo, Katibu tawala wa Wilaya ya Bagamoyo Bi. Erica Yegela, amewataka wazazi wenye wasichana wenye umri wa miaka 14 kuhakikisha wanawapeleka watoto wao Hospitalini hapo, pia katika Vituo vya Afya na Zahanati vilivyopo katika Wilaya hiyo ili wapatiwe chanjo hiyo muhimu itakayowalinda dhidi ya maradhi ya Saratani ya mlango wa kizazi.

Bi. Yegela pia akatumia fursa hiyo kutoa wito kwa watoto wa kike kutojihusisha na vitendo vya ngono mara baada ya kupatiwa chanjo hiyo kwani vitendo hivyo ndio chanzo kikubwa cha Saratani ya Mlango wa kizazi huku wanaume wakiathirika kwa kiwango kidogo.

“Serikali inatumia fedha nyingi kutibu wagonjwa wa Saratani ya shingo ya kizazi hivyo imeona ni jambo jema ianze kutoa chanjo yake ambayo ni gharama ndogo kuliko matibabu yake ili kuokoa kizazi kijacho dhidi ya maradhi hayo yanayoondoa maisha ya wanawake wengi nchini hivi sasa" Amesema Bi. Yegela.

Nae mratibu wa zoezi hilo, Dr. Mohamed Farah kwa niaba ya Mganga Mkuu Wilaya ya Bagamoyo, ameipongeza na kuishukuru Serikali kupitia Wizara ya Afya, Maendeleo ya Jamii, Jinsia, Wazee na Watoto pamoja na wadau kwa kuwezesha zoezi la utoaji wa chanjo hii muhimu kwa wasichana wenye umri wa miaka 14 Wilayani Bagamoyo ili kutokomeza maradhi ya Saratani ya mlango wa kizazi hivyo kupunguza vifo lakini pia kuwa na kizazi salama cha watoto wa kike wasio na maradhi hayo kwa miaka ijayo.

Wasichana 10 toka Shule ya msingi mwambao walipatiwa chanjo hiyo katika uzinduzi huo na chanjo hiyo sasa inapatikana hospitalini hapo hivyo wazazi na walezi wanahimizwa kupeleka mabinti zao wenye umri wa miaka 14 kupatiwa chanjo hiyo.