BAISKELI 35 KUSAIDIA USAFIRI KWA WANAFUNZI WASICHANA WAISHIO KATIKA MAZINGIRA HATARISHI BAGAMOYO

Posted on: November 21st, 2018

Taasisi isiyo Kiserikali ya Hope for young Girls Tanzania inayotekeleza mradi wa kusaidia Wanafunzi wasichana waishio katika mazingira hatarishi ndani ya Halmashauri ya Wilaya ya Bagamoyo, imetoa msaada wa Baiskeli 35, kwa wanafunzi wasichana wanaosoma Shule za Sekondari Kingani, Fukayosi na Kiromo.

Msaada huo umetolewa na taasisi hiyo kwa Wanafunzi hao ambao wanaishi mbali na mazingira ya Shule wanazosoma, zilizopo katika Kata za Kiromo, Kisutu na Fukayosi, hali inayopelekea kuwa katika hatari mbalimbali hasa alfajiri wanapokua wakielekea Shuleni na walengwa wakuu ni Wasichana wenye umri wa miaka 11-19.

Mratibu wa mradi huo Bi. Salama Kikudo amesema wanatekeleza mradi huo kwa kushirikiana na taasisi ya Mundo Cooperante iliyopo Madrid Hispania ambao ndio wafadhili wakuu wa mradi huo hapa Nchini.

“Tuna utaratibu wa kutembelea Shule za Msingi na Sekondari na kutoa elimu ya kujenga kujiamini na kujilinda kwa Wasichana wanaosoma katika Shule hizo, na huwa tunawapima uelewa wa masomo tuliyowafundisha kwa kuwauliza maswali ambayo wanayajibu kwa uandishi wa insha, Njia zingine za mawasiliano tunazotumia ni michezo mbali mbali” Anasema Bi. Salama Kikudo

Akizungumza wakati wa makabidhiano ya msaada huo, Afisa maendeleo ya Jamii wa Halmashauri ya Wilaya ya Bagamoyo, Bw. Julius Mwanganda ambaye alimwakilisha Mkurugenzi mtendaji, ameishukuru taasisi hiyo kwa msaada huo ambao utawasaidia sana wanafunzi hao kuwahi kufika shuleni asubuhi na kurudi nyumbani wakati wa jioni, lakini pia kuwaepusha na hatari na vishawishi hususani toka kwa waendesha bodaboda ambao huwarubuni wasichana kwa kuwapa lift ili kushiriki nao kimapenzi hali inayopelekea wanafunzi wengi kukatisha masomo yao kwa kupata ujauzito.

Nae Caroline Kabile, mwanafunzi wa kidato cha tatu katika Shule ya Sekondari Kingani, akizungumza kwa niaba ya wanafunzi wenzake waliopokea msaada huo amesema, msaada huo umefufua matumaini  na kuwapa chachu ya kukazana katika masomo yao, kujikita zaidi katika kutia bidii ya kufanikiwa kielimu kwa kujiepusha na vishawishi vinavyoweza kupelekea wao kukatiza masomo yao hivyo kushindwa kufikia ndoto zao.

Kwa takribani miaka miwili sasa Taasisi ya Hope for young girls Tanzania, inatekeleza mradi wa kusaidia wanafunzi wasichana waishio katika mazingira magumu katika mkoa wa Pwani, ikizihudumia Wilaya za Bagamoyo na Kisarawe.