BIDHAA ZA MAGENDO ZENYE THAMANI YA SHILINGI MIL. 25 ZATEKETEZWA

Posted on: October 2nd, 2019

Bidhaa zenye thamani ya Shilingi milioni 25, zimeteketezwa na Mamlaka ya Mapato Tanzania (TRA) kitengo cha forodha Wilaya ya Bagamoyo kwa kushirikiana na Halmashauri ya Wilaya ya Bagamoyo Idara ya Afya, Usafi wa mazingira na Udhibiti wa taka ngumu pamoja na Jeshi la Polisi.

Uteketezaji huo umefanyika leo katika dampo la Sanzale lililopo Kata ya Magomeni baada ya kubainika kuwa ni za magendo, zimekatazwa kuingizwa Nchini na hazifai kwa matumizi ya binadamu.

Bidhaa zilizoteketezwa ni pamoja na betri dazeni 12, Matairi ya magari na pikipiki 400, Nguo za mitumba balo 9, vilainishi ‘lubricants’ lita 960, mafuta ya taa lita 300, Friji 2, kompresa za friji 12 na sabuni za unga Kilo 30. Bidhaa zote zikiwa na thamani ya jumla ya Shilingi Mil. 25,949,001/-

Ofisa Forodha wa TRA Bandari ya Bagamoyo Bw. Noel Makere akizungumza wakati wa uteketezaji huo amesema bidhaa hizo ni za magendo na zilikamatwa katika doria zinayofanywa na Ofisi yake.

“Matairi haya 400 tunayoteketeza leo yamekatazwa kabisa kuingizwa na kutumika Nchini, huku bidhaa kama friji na mitumba ni bidhaa zilizozuiwa kuingizwa Nchini. Bidhaa za betri, mafuta ya taa na vilainishi ni bidhaa tunazoteketeza kutokana na kukosa ubora wakati zinakamatwa. Amesema Makere.

Bw. Makere anaongeza kusema, “Nawasihi Wafanyabishara kuwa wazalendo na kufuata sheria na taratibu za uingizaji bidhaa Nchini hususani ulipaji wa kodi ili kuepuka usumbufu na hasara zisizo za lazima. Tumekuwa tukitoa elimu na huduma bure kwa wafanya biashara ili kuwasaidia kufanya biashara zao kwa kufuata sheria na taratibu za Nchi, pia tunashirikiana vizuri na vyombo vya Ulinzi na usalama na tumejipanga kuhakikisha hakuna bidhaa za magendo zinazopitishwa Bagamoyo ili kodi ya Serikali isipotee”.

Naye Ofisa Afya wa Wilaya ya Bagamoyo Bw. Mohamed Farah, aliyesimamia uteketezaji wa bidhaa hizo, amewasihi wafanya biashara kutii sheria bila shuruti na kuhakikisha bidhaa wanazoingiza Nchini hazina madhara kwa watumiaji ili kuepuka madhara ya kiafya yanayoweza kusababishwa na matumizi ya bidhaa zilizokosa ubora na zisizofaa kwa matumizi ya binadamu.