BIDHAA ZENYE THAMANI YA SHILINGI MILIONI 93 ZAHARIBIWA

Posted on: October 2nd, 2018

Mamlaka ya mapato TRA Bagamoyo kwa kushirikiana Halmashauri ya Wilaya ya Bagamoyo Idara ya Afya na Idara ya Usafi na udhibiti wa taka ngumu, wamefanya zoezi maalumu la uteketezaji wa bidhaa zisizofaa kwa matumizi ya binadamu leo tarehe 02 Oktoba, 2018.

Zoezi hilo limefanyika katika dampo la Sanzale lililopo katika Kata ya Magomeni na bidhaa zilizoharibiwa ni pamoja na mafuta ya kupikia lita 26,840, sukari kilo 46,300, mchele kilo 5,400 maziwa kilo 950 na biskuti kilo 60, zikiwa na thamani ya Tsh 93,277,368.17.

Afisa forodha wa TRA Bagamoyo, ndg. Noel Makele amesema bidhaa zilizoteketezwa ni mali ya TRA kwani walizikamatwa kama bidhaa za magendo.

“Tumefikia hatua ya kuziteketeza bidhaa hizi kutokana na kukosa ubora wakati zinakamatwa pamoja na kuhifadhiwa kwa muda mrefu zikisubiri ufuatiliaji na hatma ya kesi mbalimbali, hii imepelekea baadhi ya bidhaa kuisha muda matumizi hivyo kutofaa kwa ajili ya matumizi ya binadamu” Anasema Ndg. Makele.

Nae Afisa Afya Bi. Agnes Nkingwa aliyesimamia zoezi hilo la Uteketezaji wa bidhaa amesema, zoezi hilo limefanyika chini ya Sheria ya Chakula, Dawa na Vipodozi sura Na. 219 ya Mwaka 2003 na kanuni zake za utupaji wa vyakula visivyofaa ya mwaka 2006.

Zoezi hilo la uteketezaji wa bidhaa lilishuhudiwa pia na Mkuu wa Wilaya ya Bagamoyo, Mhe. Zainabu Kawawa na lilifanikishwa chini ya usimamizi wa Wataalamu ambao ni Mkaguzi wa chakula kutoka TFDA kanda ya Mashariki, Maafisa kutoka Mamlaka ya Bandari, Halmashauri ya wilaya ya Bagamoyo, Mamlaka ya Mapato Bagamoyo na Jeshi la Polisi huku njia iliyotumika kuharbu bidhaa hizo ikiwa  ni kuchanganya udongo na kuzifukia.