CHUO KIKUU CHA ARDHI KUTAFITI MIGOGORO YA ARDHI BAGAMOYO

Posted on: January 25th, 2024

Chuo Kikuu Cha Ardhi kwa kushirikiana na Halmashauri ya Wilaya Ya Bagamoyo Wamefanya kikao leo tarehe 25.01.2024, katika ukumbi wa BMU ili kupata maoni mbalimbali kuhusiana na tafiti inayotarajiwa kufanyika katika Halmashauri hiyo. Dk.Mussa Muhoja ambae ni msimamizi wa utafiti chuo kikuu cha Ardhi amesema lengo ni kufanya tafiti juu ya upangaji Shirikishi na Utatuzi wa Migogoro Ya Ardhi Vijijini.

Mkuu wa Idara Ya Mipango Miji Mjini na Vijijini kutoka chuo kikuu cha Ardhi Ndg.Fredrick B. Magina amesema Mradi Huu utatekelezwa kwa kufanya tafiti, wazo kuu likiwa ni Upangaji Shirikishi na Utatuzi wa Migogoro Ya Ardhi Vijijini. Pia akasema tafiti hii itafanywa kwa kuzingatia maeneo mawili ambayo ni Upangaji Shirikishi na Utatuzi Wa Migogoro Ya Ardhi katika maeneo ya Vijijini, Upangaji Shirikishi na Utatuzi wa Migogoro Ya Ardhi katika Maeneo yaliyotengwa kwa ajili ya Shughuli mbalimbali kama vile Viwanda au taasisi.

Beatrice A. Kaijage ambaye ni mwanafunzi wa Uzamivu(PhD )katika chuo hicho amesema lengo la kufanya tafiti hiyo ni kutaka kutatua Migogoro Ya Ardhi ya Watu binafsi pamoja na Migogoro Ya Ardhi kati ya Wakulima na Wafugaji. Njia ambazo zitatumika ni kufanya vikao na wananchi lakini pia kuwapa wananchi semina mbalimbali. Lakini pia amesema malengo yake ni kutumia Teknolojia ya kidigitali zaidi katika Upangaji Shirikishi Ili Kutatua Migogoro Ya Ardhi. Akaendelea kwa kusema kutumia njia ya Teknolojia ya kidigitali kuna umuhimu kwa sababu kutasaidia kupata taarifa kwa urahisi, pia itasaidia kuonesha uhalisia upoje katika jamii. Nao wajumbe wa Halmashauri Ya Wilaya Ya Bagamoyo Walitoa Maoni Yao kuhusiana na Tafiti hiyo;

Afisa Maendeleo Ya Jamii Bi.Delvina Maleko alisema kwamba mpango huo utasaidia kupunguza tatizo hilo la Mgogoro Wa Ardhi katika Wilaya hiyo lakini pia akasema kwamba itasaidia kubadili sera na mwisho akasema itakuwa rahisi kuwavutia wawekezaji katika Wilaya hiyo.

Afisa Utumishi Halmashauri Ya wilaya ya Bagamoyo Ndg.Delfina amesema tafiti hiyo ikifanikiwa itasaidia kujua ni nani mmiliki sahihi wa eneo husika, pia itasaidia kujua maeneo gani ni ya serikali na ni yapi ya watu binafsi mwisho akasema tatizo la ufanano wa umiliki wa ardhi litaisha.

Mwisho Dk. Mussa Muhoja Alitoa shukran zake za dhati kwa kusema " Ninawashukuru kwa kutenga muda wenu na kushirikiana na sisi kwa upande wetu hatuna la ziada niwatakie utendaji kazi mwema". Nae Afisa Maendeleo Halmashauri ya Wilaya Bagamoyo Alitoa shukran zake za dhati kwa kusema "Tunashukuru kwa sababu mmetuletea kitu ambacho kitakuja kutatua kero za ardhi katika Halmashauri ya Wilaya Bagamoyo,pia nakusihi mtafiti kufanya kazi yako kwa weledi ili uweze kuleta matokeo mazuri ambayo yatasaidia kutatua changamoto hizo".