DC KAWAWA APIGA MARUFUKU UINGIZAJI MIFUGO KIHOLELA

Posted on: September 13th, 2018

MKUU wa wilaya ya Bagamoyo, Mhe. Zainab Kawawa ametoa onyo kwa baadhi ya viongozi wa Vijiji na Watendaji wanaoshiriki kukaribisha wafugaji bila utaratibu kuwa waache mara moja tabia hiyo kwani ndio kichocheo cha uvunjifu wa amani na migogoro baina ya Wafugaji na Wakulima.

Mhe. Zainab ameyasema hayo wakati akizungumza kwa nyakati tofauti na madiwani na watendaji wa Halmashauri ya Chalinze na Bagamoyo wakati wa mabaraza ya madiwani yaliyofanyika mapema wiki hii Wilayani humo.

 Mhe. Zainab alieleza kuwa wapo viongozi wanaopokea pesa toka kwa wafugaji, kisha kuwapokea kiholela katika Vijiji vyao, suala linalosababisha ongezeko la mifugo kwenye maeneo yasiyo rasmi.

 Anaongeza kuwa, kumekuwa na migogoro kati ya wakulima na wafugaji kutokana na baadhi ya wafugaji kuingiza mifugo yao kwenye mashamba ya wakulima ama wawekezaji hali inayosababisha mapigano na mikwaruzano baina yao.

“Nasema imetosha, wilaya kwasasa ina mifugo 300,000. Halmashauri ya Chalinze ina ng’ombe 240,000 na Halmashauri ya Bagamoyo ng’ombe 60, 000, Wilaya haina uwezo wa kupokea zidio la mifugo kwa sasa na kwa watendaji wa Vijiji waliokuwa wakijihusisha na uingizaji mifugo kwa kutumia njia ambazo ni kinyume cha sharia niwaonye kupitia ninyi wawakilishi wao, Wahe. Madiwani muwafikishie ujumbe huko katika Kata zenu mnazoziongoza, kuanzia sasa ni marufuku Mtendaji kuingiza mifugo kiholela katika Kijiji chake na atakaebainika kwenda kinyume na agizo hili nitamshughulikia kikamilifu” Amesema Mhe. Zainab.

Mhe. Zainab pia amesema amefanya mazungumzo na NARCO Bagamoyo waliopo katika Kata ya Vigwaza na wamesema wamekubali kutenga eneo lenye ukubwa wa heka 100,010 ambalo wamekubali kuwakodisha wafugaji wa Bagamoyo ili waweze kulisha mifugo yao kwa utaratibu wa kulipa Kiasi cha Shilingi 10,000 kwa ng’ombe mmoja kwa muda wa miezi mitatu, mitatu, utaratibu anaoamini kuwa utapunguza ongezeko la mifugo hiyo na ufugaji holela katika Wilaya ya Bagamoyo.

“Nawaomba Wahe.madiwani na watendaji tupeane ushirikiano kwa kuwafikishia ujumbe huu wa kheri kwa Wafugaji wakubwa waliopo katika maeneo yetu ili kuwashirikisha mpango huo wa NARCO ili tumalize kbisa migogoro kati ya wakulima na wafugaji katika Wilaya yetu ya Bagamoyo na naahidi binafsi kukutana na makundi ya wafugaji na kuzungumza nao kuhusu kuheshimu mipaka isiyowahusu na juu ya kupeleka mifugo yao NARCO“ Amesema Mhe. Zainab.

Nae Mkurugenzi wa Halmashauri ya Bagamoyo, Bi. Fatuma Latu amesema wamepokea maelekezo hayo na anaamini kuwa wataalamu, Wahe. Madiwani, Watendaji na Wananchi wote kwa ujumla watatoa ushirikiano mkubwa ili kumaliza migogoro kati ya Wakulima na Wafugaji Wilayani Bagamoyo na kuhakikisha wanailetea Bagamoyo maendeleo na si Migogoro.

Diwani wa Kata ya Yombo, Mohamed Usinga alisema changamoto ya kuingizwa makundi ya mifugo kiholela ni kero kubwa hasa katika Kata yake lakini mpango mpya wa Mhe. Mkuu wa Wilaya anaamini utatua kwa kiasi kikubwa changamoto hiyo na kuwaomba Wakulima na Wafugaji Wilayani Bagamoyo kuheshimiana, kupendana na kuishi kwa amani.  Usinga aliahidi kwa niaba ya madiwani wengine wa Halmashauri ya Wilaya ya Bagamoyo kumpa ushirikiano mkuu huyo mpya wa Wilaya ili kudhibiti kero hiyo.