DC KAWAWA AWAWEZESHA WAFANYA BIASHARA WADOGO WENYE UHITAJI MAALUM MTAJI

Posted on: June 9th, 2020

Vijana wawili wenye uhitaji maalum ambao pia ni wafanya biashara wa mafuta ya kupikia Mjini hapa, wamepokea msaada maalum wa mtaji wa Shilingi 210,000/- kila mmoja sawa na madumu 5 ya mafuta yenye ujazo wa lita 20 ili wakaendelee na biashara hiyo waliyokuwa wakifanya hapo awali kabla ya kukabiliana na changamoto ya kuishiwa mtaji.

Msaada huo umetolewa kwa vijana hao na Mkuu wa Wilaya ya Bagamoyo Mhe. Zainab Kawawa Ofisini kwake hapo leo ikiwa ni katika kutimiza ahadi yake aliyowapa vijana hao kuwa atawasaidia mtaji ili waendelee na biashara zao baada ya kusimama kwa muda kwa kuishiwa mtaji.

“Leo nimewaita hapa Ofisini kwangu hawa ndg. Maneno Fadhili Maneno na ndg. Juma Mharami ambao ni wafanya biashara wadogo wa mafuta ya kupikia maarufu kama shuba shuba katika bandari yetu hii ya Bagamoyo, ili kutimiza ahadi yangu niliyowaahidi juma lililopita kuwa nitawasaidia mtaji ili waendelee na biashara zao baada ya kuishiwa mtaji kutokana na changamoto zilizokuwa zimejitokeza katika bandari yetu ya Bagamoyo zilizofanya shughuli katika bandari hiyo kusimama, changamoto ambazo zimeshafanyiwa kazi hivyo bandari kurudi katika utendaji wake wa awali hivyo ndugu zetu hawa pia wanahitajika warudi bandarini hapo kuendelea na biashara yao na leo nimewawezesha mtaji huu wa Shilingi 210,000/- kila mmoja, nendeni mkazitumie fedha hizi kwa malengo mliyojiwekea, hakikisheni zinawasaidia kibiashara na mnasimama tena kiuchumi kama ilivyokuwa awali naamini hamtaniangusha” Amesema Mhe. Zainab

Baada ya kupokea msaada huo, Mmoja wa Wafanya biashara hao Ndg. Maneno Fadhili Manenoakizungumza kwa niaba ya Mwenzake, amemshukuru sana Mhe. Zainab kwa kujitoa na kuwathamini wao na kuwatazama kwa jicho la tofauti na kuamua kuwasaidia ili nao waweze kujikwamua kiuchumi na kupata uwezo wa kuhudumia familia zao

Naye, Mwenyekiti wa Chama cha Wafanya biashara Wilayani hapa Ndg. Shaban Khamsin almaarufu “Chavurugu” ambaye ameshuhudia makabidhiano hayo amesifu weledi na utendaji kazi wa Mkuu wa Wilaya ya Bagamoyo Mhe. Zainab Kawawa kwa kuhakikisha wafanya biashara hao wenye uhitaji maalum kupata msaada huo utakaowawezesha kuendelea na biashara yao ya mafuta na kuendesha familia zao

“Haijapata kutokea kiongozi mwenye moyo wa upendo na kujitoa kwa wanyonge kama wewe Mheshimiwa Zainab, umetuonesha upendo na kutujali sana wana bagamoyo na msaada uliowapatia Ndg. Maneno na mwenzake Muharami ni msaada mkubwa na umetuonesha utu hasa hawa wenzetu waliokuwa wamekwama na maisha yao kusimama ama hakika tendo hili tutalikumbuka daima” Amesema Ndg. Shabani.

Mkuu wa Wilaya ya Bagamoyo ametoa msaada huo ikiwa ni kutimiza ahadi yake aliyowapatia vijana hao wiki iliyopita, baada ya kuishiwa kabisa mtaji kutokana bandari ya Bagamoyo kusimama kufanya kazi kwa kipindi cha miezi mitatu iliyopita, wafanya biashara hao wadogo wa mafuta ni wenye uhitaji maalum hivyo msaada huo utawawezesha kujikwamua toka katika changamoto za kimaisha kwa kuanza tena kufanya biashara yao ya mafuta ya kupikia wanayoagiza kutoka Unguja na kuja kuuza kwa reja reja hapa Bagamoyo.