DED BAGAMOYO APONGEZA MRADI WA ZAO LA MCHICHA CHAMBEZI

Posted on: September 26th, 2020

Mkurugenzi Mtendaji wa Halmashauri ya Wilaya ya Bagamoyo, Bi. Fatuma O. Latu, amepongeza utekelezaji wa mradi wa utafiti wa mbegu bora za Mchicha unaofahamika kama “Amazing Amaranth” uliotekelezwa na Kituo kidogo cha Taasisi ya Utafiti wa Kilimo Tanzania (TARI) Chambezi katika Kitongoji cha Chambezi Wilayani hapa.

Pongezi hizo zimetolewa na Mkurugenzi Fatuma Latu, aliyekuwa Mgeni rasmi katika Siku maalum ya Mkulima wa Zao la Mchicha iliyofanyika katika Kituo kidogo cha Utafiti wa Kilimo cha TARI Chambezi Septemba 26, 2020.

“Niwapongeze wakulima na watafiti walioshiriki katika utekelezaji wa mradi huu wa ‘Amazing Amaranths” (Mchicha zao la kushangaza) tangu kuanzishwa kwake Mwaka 2018. Mradi huu umetekelezwa katika Mkoa wa pwani na Mikoa ya kaskazini ikiwa ni pamoja na Mkoa wa Arusha na Kilimanjaro na kushirikisha wakulima, maafisa ugani, wauzaji wa pembejeo za kilimo na watafiti wa Kilimo. Mradi umefanikiwa kutoa matokeo ya Mbegu bora 05 za Mchicha ambazo zinafaa kulimwa katika maeneo yetu na kutuletea tija Kiafya kwa kuboresha lishe, iwapo Mchicha huo utatumika kama Chakula na Kiuchumi iwapo Mkulima atalima Mchicha kibiashara kwa kuuza kama mboga mboga ama kusindika malighafi zitokanazo na zao la Mchicha na kupata bidhaa mbalimbali kama unga wa Mchicha au vitafunwa vya Mchicha”. Amesema Mkurugenzi Fatuma.

Anaongeza Mkurugenzi Fatuma, Mchicha ni zao lisilopewa kipaumbele, lakini nawapongeza TARI Chambezi kwa kubuni mradi huu ulioleta matokeo tofauti kabisa na kuondoa dhana ya Wananchi kudhani Mchicha si zao muhimu, badala yake sasa wataanza kuona umuhimu wa zao la Mchicha linaloweza kuboresha lishe ya jamii na linapolimwa kibiashara linaweza kumtoa Mkulima katika umaskini kabisa.

“Tatizo la utapiamlo kwa watoto walio chini ya miaka 05, bado ni janga Nchini na takwimu za udumavu kwa sasa ni kati ya Asilimia 34 hadi 14 huku tatizo la uzito mdogo na ukondefu ni Asilimia 5, viwango hivi havikubaliki na kama Wataalam wa Kilimo na Lishe tuna wajibu wa kuhamasisha jamii kutumia vyakula vyenye virutubisho vya kutosha ili kuondokana na maradhi haya ya Utapiamlo, ukondefu na udumavu, bahati nzuri vyakula vyenye viini lishe hivyo vinapatikana katika zao la Mchicha ambalo kila mwanajamii ana uwezo wa kulima nyumbani na kupata chakula hiki chenye uwezo mkubwa wa kuondoa tatizo hili pale tu Mchicha utakapoandaliwa kwa ubora unaotakiwa, hivyo natoa rai kwa wanajamii ya Bagamoyo na kwingineko Nchini kulipa kipaumbele zao la Mchicha ili kuondokana na utapiamlo na kuongeza kipato cha familia”. Amesisitiza Mkurugenzi Fatuma.

Nae Meneja wa kituo cha utafiti wa Kilimo Nchini TARI Mikocheni Ndg. Zuberi Bira akizungumza katika hafla hiyo amesema Lengo kuu la mradi wa “Amazing Amaranths” ni kuongeza uzalishaji na upatikanaji wa mbegu bora wa zao la Mchicha, kuinua uchumi na kuondoa utapiamlo Nchini.

Pia Mradi unahusika na tafiti za kuboresha upishi wa Mchicha, Utoaji mafunzo kwa wadau na upatikanaji wa mbegu mpya bora za mchicha na kwamba hadi sasa mbegu 05 bora za Mchicha, zimepasishwa katika mradi huo, Mbegu hizo ni Madiira 1, Madiira 2, Nguruma, Akeri na Poli ambazo zimepandwa katika kituo hicho cha utafiti na kuonesha matokeo mazuri huku akiwaasa Wanajamii kutumia mbegu hizo na kutoa elimu kwa wengine ili watumie fursa hii ya uzalishaji wa Mchicha na kuboresha lishe katika jamii yetu.

Hafla ya maadhimisho ya siku ya Mkulima wa Zao la Mchicha, imefanyika katika kituo kidogo cha utafiti cha TARI Chambezi huku Mgeni rasmi katika siku hiyo akiwa ni Mkurugenzi Mtendaji wa Halmashauri ya Wilaya ya Bagamoyo, Bi. Fatuma O. Latu ambaye mbali ya kuzungumza na wataalam wa kilimo, Afya, lishe na Wakulima na Wananchi waliohudhuria hafla hiyo pia alikagua mabanda ya maonesho ya shughuli za wajasiriamali wa bidhaa za zitokanazo na Mchicha ambapo wajasiriamali walionesha bidhaa za uji wa Mchicha, supu ya Mchicha, bisi za Mchicha, Keki ya Mchicha, Unga lishe wa Mchicha, Cerellac ya Mchicha na Mbegu bora 05 za Mchicha.