GOODNEIGHBORS YACHANGIA MAPAMBANO DHIDI YA CORONA BAGAMOYO

Posted on: April 28th, 2020

Taasisi isiyo ya Kiserikali ya Good neighbors Tanzania imetoa msaada wa sabuni na vitakasa mikono 6198 kwa watoto wanaoishi katika Kata za Yombo na Fukayosi, ikiwa ni msaada unaolenga kuunga mkono mapambano dhidi ya Ugonjwa wa Homa kali ya Mapafu inayosababishwa na virusi vya Corona.

Akizungumza mapema jana Afisa Programu wa Taasisi hiyo Bi. Prisca Peter Chande amesema, mpaka sasa wametoa jumla ya Sabuni na Vitakasa mikono 6198 kwa watoto wanaoishi katika Kata za Fukayosi na Yombo lengo likiwa na kuwakinga watoto hao na familia zao na maambukizi ya Ugonjwa wa Corona.

“Tunafurahi kuwafikia watoto takribani 3000 katika Kata hizi na tunaamini msaada huu utawawezesha kujikinga na maambukizi ya Corona kwani watoto hawa wamepewa mafunzo ya namna ya kunawa mikono kwa sabuni na maji tiririka na wazazi wao kuhamasishwa kuhakikisha wanaweka vibuyu chirizi katika kila kaya ili wanafamilia wajenge mazoea ya kunawa mikono kwa sabuni wakitumia maji tiririka mara kwa mara hasa katika kipindi hiki cha mlipuko wa ugonjwa wa corona”

Anaongeza, msaada huu pia umetolewa katika Ofisi za Serikali za Vijiji vya Kata za Yombo na Fukayosi ili wananchi wanaofika kupata huduma katika Ofisi hizo watumie sabuni na vitakasa mikono hivyo kujisafisha mikono kabla ya kuingia kupata huduma jambo ambalo litasaidia kuongeza kinga dhidi ya maambukizi ya ugonjwa wa corona

Bi. Prisca anaongeza kusema, kama hiyo haitoshi wameona ni vyema kutoa  sabuni 450 na vitakasa mikono 1270 kwa Ofisi za Mkurugenzi wa Halmashauri ya Wilaya ya Bagamoyo ili zisaidie katika mapambano dhidi ya ugonjwa wa Corona Wilayani Bagamoyo

Akipokea msaada huo Mkurugenzi wa Halmashauri ya Wilaya ya Bagamoyo, Bi. Fatuma O. Latu ameishukuru taasisi hiyo ya Good neighbors kwa kujitolea kuungana naye katika mapambano dhidi ya ugonjwa wa Corona katika Halmashauri ya Wilaya ya Bagamoyo na kwamba amefurahi sana kwani Ofisi za Halmashauri zinatoa huduma kwa Wananchi wanaotoka pande mbalimbali za Bagamoyo na wanapofika katika Ofisi za Halmashauri ni vyema wakajikinga wao binafsi na kuwakinga watumishi wanaowahudumia kwa kuhakikisha wamenawa mikono kwa sabuni na maji tiririka yaliyowekwa nje ya kila Ofisi za Halmashauri, hivyo msaada huo utasaidia sana katika mapambano dhidi ya Ugonjwa wa Corona.

Naye Mwenyekiti wa Halmashauri ya Wilaya ya Bagamoyo, Mhe. Alli Alli Issa, akizungumza wakati wa kupokea msaada huo amesema anaishikuru taasisi hiyo ya good neighbors kwa msaada huo uliokuja kwa wakati mwafaka kabisa kwani Uhitaji wa vifaa vya kujikinga dhidi ya maambukizi ya ugonjwa wa corona ni mkubwa sana kwa sasa, hivyo ni faraja kubwa kupata msaada huo katika kipindi hiki.