HALMASHAURI YATEKELEZA MIRADI YENYE THAMANI YA SHILINGI 39,576,000/= KATIKA KIPINDI CHA ROBO YA NNE YA 2018/2019

Posted on: August 23rd, 2019

Kamati ya waheshimiwa Madiwani ya Elimu, Afya na Maji ya Halmashauri ya Wilaya ya Bagamoyo imefanya ukaguzi wa miradi ya maendeleo yenye thamani ya Shilingi 39,576,000/=

Ukaguzi wa miradi hii umefanyika katika utaratibu wa ukaguzi wa miradi unaofanywa na kamati ya Elimu,Afya na Maji kila robo mwaka, na ukaguzi huu ni wa robo ya nne ya Mwaka 2018/2019.

Mwenyekiti wa Kamati ya Elimu, Afya na Maji, Mhe. Ibrahim Mbonde ambaye pia ni diwani wa Kata ya Mapinga ameiongoza kamati hiyo, kukagua mradi wa Ujenzi wa vyumba viwili vya madarasa katika Shule ya Msingi Mapinga iliyopo Kata ya Kerege uliogharimu Kiasi cha Shilingi 25,000,000/= mradi ambao hadi sasa umekamilika, Ujenzi wa matundu 10 ya vyoo katika Shule ya Msingi Kiharaka, uliogharimu kiasi cha Shilingi 10,000,000/= ukiwa katika hatua za Ukamilishaji, Ujenzi wa zahanati ya Kimalang'ombe uliopatiwa Shilingi 4,576,000/= kwa ajili ya kupaua jengo la Zahanati hiyo. Fedha zote zilizotolewa kutekeleza miradi hii ni fedha za mapato ya ndani ya Halmashauri.

Kamati ya Elimu, Afya na Maji inaundwa na Mhe. Ali Ali Issa (M/kiti HW Bagamoyo)

Mhe. Ibrahim Mbonde (M/kiti Kamati ya EAM, Diwani Kata ya Mapinga)

Mhe. Hassan Usinga - Wembe (Diwani Kata ya Kiromo)

Mhe. Dickson Makamba (Diwani Kata ya Dunda)

Mhe. Elizabeth Shija (Diwani Viti Maalum Tarafa ya Yombo)

Mhe. Mohamed Mwinyigogo (Diwani Kata ya Zinga)

Mwenyekiti wa Halmashauri ya Wilaya ya Bagamoyo, Mhe. Ali Ali Issa, akiwa katika ukaguzi wa mradi wa Ujenzi wa Matundu 10 ya vyoo katika Shule ya Msingi Kiharaka amesikitishwa na jinsi ambavyo ukamilihsaji wa mradi huo unasua sua na kuwataka Viongozi wa maeneo hayo kushirikiana na Wananchi kuhakikisha mradi huo unakimilika haraka kwani upo nje ya muda wa utekelezaji wake.

Nae Mhe. Ibrahim Mbonde ambaye pia ni Mwenyekiti wa kamati hiyo amewaasa Wananchi kuhakikisha wanachangia shughuli za maendeleo, ili kurahisisha utoaji wa huduma za Elimu, Afya na Maji katika maeneo yao hivyo kuiletea jamii nzima maendeleo stahiki.