HOSPITALI YA WILAYA YA BAGAMOYO YAPATA UFADHILI WA ULTRA SOUND MBILI

Posted on: March 26th, 2019

Hospitali ya Wilaya ya Bagamoyo, imepokea vifaa tiba kwa ajili ya matumizi ya Hospitali hiyo iliyokuwa katika uhaba mkubwa wa vitendea kazi hivyo kwa takribani Mwaka mmoja sasa.

Vifaa vilivyopokelewa ni pamoja na Ultra sound mashine mbili, Auto clave (Mashine inayotumika kutakasa nguo na vifaa tiba) moja na Full blood picture machine (Mashine inayotumika kupimia damu) moja.

Mkurugenzi wa Halmashauri ya Wilaya ya Bagamoyo. Bi. Fatuma Latu, amewashukuru wafadhili hao ambao ni Muungano wa Rotary Club ya Waitaliano na Watanzania kwa msaada huo ambao ulihitajika sana na Hospitali ya Wilaya ya Bagamoyo kwani Hospitali hiyo ndio Hospitali kuu ya Wilaya na huduma ya Ultra sound ni muhimu kuwapo katika Hospitali hiyo.

“Wananchi wa Bagamoyo wameteseka muda mrefu kwa kukosa huduma ya Ultra Sound na walikuwa wakiipata katika Kituo cha Afya cha binafsi kwa gharama kubwa, na suala hili lilikuwa likitufedhehesha sana, hivyo msaada huu ni wenye tija kwa Halmashauri ya Wilaya ya Bagamoyo na Wakazi wake” Amesema Bi. Fatuma

Nae Mganga Mkuu wa Hospitali hiyo, Dkt. Aziz Msuya amesema Ultra sound hizo mbili zina uwezo wa kuhudumia Wananchi 52 kwa siku Moja na vinagharimu jumla ya Shilingi Milioni 108. Vifaa vingine vilivyotolewa na wafadhili hao ni pamoja na Autoclave (Kitakasa nguo na vifaa tiba) pamoja na Mashine ya kupimia damu (Full Blood Picture) ambavyo vyote vimetolewa na klabu ya wafadhili hao.