INEC YAONYA MAKARANI KUHUSU UTUNZAJI WA SIRI ZA UCHAGUZI....

Posted on: October 27th, 2025

INEC YAONYA MAKARANI KUHUSU UTUNZAJI WA SIRI ZA UCHAGUZI

Tume Huru ya Taifa ya Uchaguzi (INEC) imewaonya makarani wa uchaguzi kutojihusisha na utoaji wa taarifa za siri za uchaguzi, na imewataka kusimamia viapo vyao vya utunzaji wa siri katika kipindi chote cha uchaguzi.

Hayo yamesemwa  na Mjumbe wa Tume, Mheshimiwa Balozi Omar Ramadhan Mapuri, wakati alipotembelea mafunzo ya makarani waongozaji wa vituo vya kupigia kura katika Jimbo  la  Bagamoyo.

Balozi Mapuri amesema kuwa makarani wote wanapaswa kutambua umuhimu wa kudumisha maadili ya kazi zao na kuhakikisha taarifa zote za uchaguzi zinabaki kuwa siri ya tume hadi pale zitakapotangazwa rasmi.

Aidha, amefafanua kuhusu viapo vya kujiondoa uanachama wa chama cha siasa kwa makarani ambao ni wanachama wa vyama vya siasa, akisema kuwa hatua hiyo haimaanishi kuwafuta uanachama wao kabisa, bali ni kwa muda wa utekelezaji wa majukumu ya tume.

Tume imeendelea kusisitiza kuwa maandalizi hayo ni sehemu ya kuhakikisha uchaguzi unakuwa huru, haki na wa uwazi katika maeneo yote nchini.