JAFFO AZINDUA MAJENGO MAPYA HOSPITALI YA WILAYA YA BAGAMOYO

Posted on: July 7th, 2018

Waziri wa Nchi Ofisi ya Rais (TAMISEMI), Mhe. Seleman Said Jaffo amemtaka Mganga Mkuu wa Mkoa wa Pwani kuhakikisha kuwa, hakuna kituo cha Afya katika mkoa huo kinachopata nyota sifuri katika utoaji huduma kwa Wananchi.

Mhe. Waziri Jaffo alitoa agizo hilo jana wakati alipomwakilisha Mhe. Makamu wa Rais, Mama Samia Suluhu Hassan katika uzinduzi wodi ya wazazi na jengo huduma ya dharura katika hospitali ya Wilaya ya Bagamoyo, majengo yaliyojengwa kwa ufadhili wa taasisi ya Dhi Nureyin Islamic Foundation ya mkoani Iringa.
Jaffo akatumia fursa hiyo kusisitiza juu ya utoaji huduma bora za Afya katika vituo vyote vya Afya katika Mkoa wa Pwani na kuongeza kuwa, hakuna sababu ya kituo chochote cha Afya Nchini kushindwa kutoa huduma bora kwa Wananchi kwani Serikali ya awamu ya tano, chini ya Uongozi wa Mhe. Rais Dkt. John Pombe Magufuli, imefanya kazi kubwa na ya kupigiwa mfano kwa kujenga vituo vingi vya Afya kote Nchini ili kuboresha huduma ya Afya hususani huduma bora za Afya ya Mama na Mtoto, hivyo ni aibu kubwa kwa kituo cha Afya kupata nyota sifuri katika utoaji huduma kwa Wananchi, ilihali Serikali inajitahidi kuweka mazingira mazuri katika vituo vya kutolea huduma za Afya pamoja na kuongeza Wataalam wa Sekta ya Afya katika Halmashauri zote Nchini.

"Mganga Mkuu Mkoa wa Pwani kama itatokea kituo chochote cha afya katika mkoa wako kikapata nyota sifuri katika utoaji huduma kwa Wananchi itabidi uje ofisini kwangu kujieleza, tusicheze na Afya za Wananchi wetu wakati Serikali inaweka mazingira mazuri katika idara hiyo, hivyo jipangeni na waganga wakuu wa Wilaya kuhakikisha hilo halitokei, " amesema Jaffo.

Mhe. Jaffo pia ameipongeza taasisi hiyo ya Dhi Nureyin kwa kuweza kuwajengea majengo hayo ya kisasa na muhimu katika mkoa huo wa Pwani.

Mbali ya kuwapongeza Dhi Nureyin kwa ujenzi huo lakini pia Mhe. Waziri Jaffo amempongeza Mkuu wa Wilaya ya Bagamoyo, Alhaj Majid Hemed Mwanga, kwa kuweza kutafuta ufadhili huo, na hatimaye kupata majengo hayo.
Aidha, akawataka Wahudumu wa Afya  Mkoani humo, kuhakikisha wanatoa huduma nzuri kwa Wananchi na kuacha tabia ya kutowatolea maneno makali na lugha chafu pindi wanapohitaji huduma ya afya.

Akizungumza katika uzinduzi huo, Mkuu wa Mkoa wa Pwani, Mhe. Mhandisi Evarist Ndikilo amesema kupatikana kwa majengo hayo ni ukombozi kwa Mkoa huo kutokana na ongezeko la Wananchi Mkoani humo wanaoongezeka kila kukicha.
Ndikilo aliwataka Wananchi pamoja na wadau mbalimbali wa Afya Nchini nan je ya Nchi, kuiga mfano wa taasisi hiyo ya Dhi Nureyin kwa kushirikiana na Serikali katika kujenga na kuboresha vituo vya Afya.

Nae Mwenyekiti wa Taasisi ya Dhi Nureyin, Sheikh Said Abry, amesema mradi huo wa ujenzi  wa majengo hayo mawili umegharimu kiasi cha Sh. Mil.703 na kuongeza kuwa mbali ya ujenzi huo pia wamefadhili vifaa tiba vyote vitakavyowekwa ndani ya majengo hayo na kuongeza kuwa taasisi hiyo itaendelea kushirikiana na Serikali katika kusaidia kuboresha sekta mbalimbali kama ambavyo wamekuwa wakifanya kwa muda mrefu hapa Nchini.