JAMII YAMAHASISHWA KUZINGATIA LISHE BORA

Posted on: August 26th, 2020

Kila Familia na jamii inapaswa kufahamu kuhusiana na umuhimu wa lishe bora, kwani lishe bora ndio msingi wa Afya bora, familia imara na Taifa lenye nguvu.

Lishe bora maana yake ni mkusanyiko wa vyakula mbalimbali ambavyo kwa pamoja huimarisha na kuujenga mwili wa binadamu, vyakula hivi ni vile vyenye protini, mafuta na sukari, nafaka, vyakula jamii ya mikunde, mboga mboga na matunda.

Halmashauri ya Wilaya ya Bagamoyo leo Agosti 26, 2020 imeadhimisha siku ya lishe ambapo Mkuu wa Wilaya ya Bagamoyo, Mhe. Zainab Kawawa aliyekuwa Mgeni rasmi, amewaongoza Wananchi kutoka pande zote za Halmashauri hiyo kushiriki maadhimisho hayo yaliyofanyika katika uwanja wa Top Top uliopo Kata ya Dunda ili kupata elimu ya masuala ya lishe kutoka kwa wataalam wa Afya na lishe bora waliotoka kwenye Taasisi zinazojihusisha na masuala ya lishe Wilayani Bagamoyo.

Akiwasilisha taarifa ya utekelezaji wa shughuli za lishe, mratibu wa Lishe Wilaya Bi. Sophia Makame, amesema katika kipindi cha Mwaka 2019/2020 kitengo cha Lishe Wilaya kimefanikiwa kuongeza kiwango cha utoaji elimu ya lishe katika vituo vya kutolea huduma za Afya kutoka 88.4 Julai-Desemba 2019 hadi 116% Januari-Machi 2020, huku lishe ikiwekwa kuwa ajenda ya kudumu katika vikao vya maendeleo ya Kata kila robo ili elimu ya lishe ifike katika ngazi ya chini ya jamii na hii imesaidia kuongeza uelewa wa lishe bora kwa jamii kutoka wakina mama 6685-7360 huku watoto wanaotambulika kuwa na matatizo ya utapiamlo wakipatiwa matibabu na chakula dawa hivyo kuwasaidia kuondokana na tatizo hilo.

Nae Mkuu wa Wilaya ya Bagamoyo Mhe. Zainab Kawawa akizungumza katika maadhimisho hayo amesema amefarijika sana kuona kiwango cha elimu ya lishe bora kimeeleweka katika ngazi ya jamii na wakina mama kuweza kuandaa chakula bora kwa ajili ya familia zao na kingine kutengeneza kwa ajili ya kuuza na kujiongezea kipato huku akitumia fursa hiyo wanawake wanaonyonyesha kuzingatia unyonyeshaji wa watoto wao ili kuwajengea Afya bora na kinga dhidi ya magonjwa mbali mbali ya utotoni.

“Takwimu zinaonesha kwamba 97% ya wanawake wananyonyesha watoto lakini hawazingatii maelekezo ya wataalam ya Afya katika kunyonyesha watoto huku 67% ya watoto wenye umri wa kuanzia miezi 06  hadi miaka 3 hawapati lishe bora hivyo kupelekea watoto hawa kupata utapiamlo, nawaasa wakinamama mzingatie kuwapa lishe bora watoto wenu na kuwapeleka kliniki kila mwezi ili kufatilia ukuaji wao na hali zao za lishe na wataalam wa Afya hakikisheni kila wakina mama wanapohudhuria kliniki mnatumia nafasi hiyo kuwapa elimu juu ya lishe bora kwa watoto wao ili tuwe na watoto wenye makuzi imara na tujenge Taifa imara la watu wenye lishe bora”. Amesema Mhe. Zainab

Takribani Miaka 20 sasa Tanzania imekua ikiadhimisha Siku ya Lishe na maboresho makubwa yamefanyika katika sekta ya lishe Nchini huku maadhimisho yam waka huu yakibebwa na kauli mbiu inayosema “Tuwawezeshe wanawake kuwanyonyesha watoto kwa Afya bora na ulinzi wa Mazingira”