JUKWAA LA UWEZESHAJI WANAWAKE KIUCHUMI LIWE CHACHU YA TANZANIA YA VIWANDA

Posted on: December 24th, 2017

Hayo yamesemwa leo na Naibu Waziri wa Nishati Mhe. Subira  Mgalu,  wakati akifunga maonesho ya wajasiriamali wanawake wa Halmashauri ya Wilaya Bagamoyo katika viwanja vya Shule ya Msingi Mwanamakuka.

"Naipongeza sana Halmashauri ya Wilaya ya Bagamoyo kwa kufanikiwa kutekeleza agizo la Mhe. Makamu wa Rais Mama Samia Suluhu Hassan kwa vitendo na kuanzisha Jukwaa la uwezeshaji Wanawake kiuchumi katika Halmashauri yenu" Alisema Mhe. Mgalu.

Jumla ya vikundi 26 vya Wanawake wajasiriamali vilishiriki maonesho hayo yaliyofanyika kwa muda wa siku sita huku taasisi ya Sober house Bagamoyo na TFDA pia wakishiriki katika maonesho hayo ambapo wamekuwa wakiwaelimisha Wananchi juu ya huduma mbalimbali wanazotoa kwa Wananchi.

Baadhi ya bidhaa zilizooneshwa na Wanawake wajasiriamali hao wakati wa maonesho hayo ni pamoja na bidhaa za usindikaji matunda, Ususi, Ufumaji, mboga mboga, mvinyo, sabuni na dawa asili ambapo Mhe. Naibu Waziri Mgalu ametoa ahadi msaada wa kodi ya miezi mitatu kwa Wazee Wanawake wajasiriamali walioshiriki maonesho hayo huku akisisitiza vikundi vilivyoshiriki maonesho hayo na havina mikopo mwaka ujao wapate mikopo toka Halmashauri.

Pia Mhe. Mgalu ametumia fursa hiyo kutoa agizo kwa Tanesco Bagamoyo kumalizia tatizo la Umeme Bagamoyo na kuahidi kumalizia tatizo la kutokufika Umeme kitongoji cha sanzale Kata ya Magomeni.

Mmoja wa washiriki wa maonesho hayo Bi. Verediana Emmanuel akitoa ushuhuda wake amesema, amepata ujuzi, Elimu zaidi ya ujasiriamali, kupanua masoko ya bidhaa,  kubadilishana mawazo na fursa ya mikopo kupitia maonesho hayo na kuwaasa Wanawake wasijibweteke bali washiriki katika kukuza uchumi binafsi na Taifa kwa ujumla.

Nae mbunge wa jimbo la Bagamoyo Mhe. Shukuru Kawambwa akizungunza na Wananchi wakati wa kufunga maonesho hayo akawakumbusha wanawake juu ya  umuhum wa kujiunga katika vikundi vya ujasiriamali ili kupata fursa za mikopo toka kwenye taasisi za kifedha nchini huku akimshukuru Mgeni rasmi kwa kuwahakikishia wakazi kitongoji cha sanzale umeme wa uhakika.