Jumuiya ya  Wafanya biashara Mkoa wa Pwani wametembelea  Wilaya ya Bagamoyo  leo tarehe 26 julai 2023 na kufanya kikao na uongozi wa  Wilaya katika ukumbi wa Halmashauri kwa lengo la kuzifahamu fursa  za kibiashara zilizopo.

 Akizungumza katika kikao hicho, Afisa Biashara wa Halmashauri ya Wilaya ya Bagamoyo Bi. Magdalena Kitilla aliwakaribisha wafanya biashara hao na kuwapa muongozo juu ya fursa zilizopo ndani ya Wilaya ikiwemo uvuvi , kilimo cha umwagiliaji ,utalii wa ndani , ufugaji , na uchimbaji madini . “Nitumie fursa hii kuwakaribisha ndugu zangu wafanya Biashara katika Halmashauri yetu ili tuweze kuzitumia fursa nyingi za kibiashara zilizopo katika Wilaya yetu na wasihi sana mje muwekeze katika maeneo haya ili tuweze kukuza na kuendeleza Halmashauri yetu kupitia mapato ya Ndani .” Alisema Bi Magdalena Kitilla.

 Aidha, Kaimu Mkurugenzi Mtendaji Halmashauri Ndg. Majid Mhina aliwaomba wafanya Biashara hao kuja kufanya uwekezaji na kuimarisha uhusiano na ushirikiano mzuri kati yao na Halmashauri kwa lengo la kukuza uchumi wetu.

 Kwa upande wake, Alex Kisonga ambaye ni mmoja wa wafanya biashara walio hudhuria katika kikao hicho, alisema wanaiomba Halmashauri kutenga maeneo rasmi yatakayo tumika katika shughuli zote za kibiashara na uwekezaji.

 Sambamba na hayo, Mwenyekiti wa wafanya biashara hao Bwana Abdallah Ndauka aliishukuru na kuishauri Halmashauri kuboresha maeneo ya kufanyia biashara ili kuwavutia wawekezaji kuja kuwekeza katika Wilaya ya Bagamoyo