KAMATI YA FEDHA, UONGOZI NA MIPAGO YAKAGUA MIRADI YA MAENDELEO

Posted on: November 21st, 2018

Kamati ya Fedha, Uongozi na Mipango ya Halmashauri imetembelea na kukagua miradi mbalimbali ya Maendeleo kwa robo ya kwanza ya Julai-Septemba ya Mwaka wa Fedha 2018/2019.

Kamati hiyo ikiongozwa na Makamu Mwenyekiti wa halmashauri Mhe. Said Rajabu Ngatipura ilianza kwa kukagua kituo cha ukusanyaji mapato ya Mchanga kilichopo barabara ya Kiromo Chambezi katika Kata ya Kiromo.

Wakiwa katika kituo hiko wajumbe wa kamati hiyo wamepata taarifa ya ukusanyaji mapato kwa siku hadi mwezi, pia kusikiliza changamoto zinazokikabili kituo, huku wakiahidi kuzitafutia ufumbuzi zile zinazowezekana kutafutiwa ufumbuzi wa haraka, huku wakisisitiza uadilifu na uaminifu kwa wakusanyaji mapato katika kituo hiko.

Wajumbe pia wameitembelea na kuikagua barabara ya kiromo chambezi inayotumiwa zaidi na malori ya kubeba mchanga toka machimbo ya mchanga ya Kiromo chambezi, na kuona changamoto zinazoikabili barabara hiyo, suala ambalo wamelichukua ili kuona namna ya kulitaftia ufumbuzi na kumaliza kabisa changamoto zinazoikabili barabara hiyo kwa kushirikiana na wakala wa kusimamia ujenzi wa barabara za vijijini yaani TARURA.

Kamati pia imetembelea mradi wa ujenzi wa Kituo kipya cha Afya Matimbwa, kilichopo katika Kata ya Yombo na kukagua mradi huo unaotekelezwa kwa ufadhili wa fedha toka Serikali Kuu, kiasi cha Milioni 400 kupitia Wizara ya Nchi, Ofisi ya Rais TAMISEMI, Kituo kinachotazamiwa kukamilika ifikapo tarehe 30 Novemba, 2018.

Ujenzi wa Kituo cha Afya Matimbwa upo katika hatua za ukamilishaji, na mradi una jumla ya majengo makuu matatu ambayo ni Nyumba ya mtumishi, Jengo pacha linalojumuisha jengo la upasuaji na wodi ya wazazi, na jengo la tatu ni jengo la maabara.

Makamu Mwenyekiti wa Halmashauri Mhe. Said Rajab Ngatipura akasisitiza wataalam wa Halmashauri kuhakikisha mradi huo unakamilika ndani ya wakati uliopangwa na Serikali bila visingizio ili kutimiza adhma ya Serikali ya kuufadhili mradi huo.

Mradi mwingine uliotembelewa na kukaguliwa na kamati ni mradi wa Soko la Tandika, lililopo katika Kata ya Dunda, wakiwa katika eneo la mradi, kamati imepokea taarifa ya utekelezaji wa mradi inayoonesha mradi kukwama kuanza kufanya kazi kwa wafanyabiashara kutohamia wala kuanza kufanya biashara katika soko hilo, kutokana na miundombinu kutokuwa rafiki hususani soko kujaa maji wakati wa mvua.

Kamati imelichukua suala hilo kwa ajili ya kusimamia utekelezaji wake, ili soko la tandika lianze kufanya kazi haraka iwezekanavyo.

Akihitimisha ziara hiyo Makamu Mwenyekiti wa Halmashauri Mheshimiwa Said Rajabu Ngatipura aliwashukuru wasimamizi wa miradi katika sekta mbalimbali kwa kuonyesha moyo wa uzalendo katika utekelezaji wa miradi hiyo na kuwataka watendaji wa Halmashauri kuipitia Mara kwa Mara miradi inayotekelezwa ili iweze kuleta tija kwa Wananchi.