KAMATI YA HUDUMA ZA JAMII YAKAGUA NA KUTEMBELEA MIRADI 7 YA MAENDELEO

Posted on: February 9th, 2019

Mwenyekiti wa kamati ya huduma za jamii ya Waheshimiwa madiwani wa Halmashauri ya Wilaya ya Bagamoyo, Mhe. Ibrahim Mbonde, ameongoza wajumbe wa kamati hiyo na Wataalam wa Halmashauri kukagua miradi ya maendeleo inayotekelezwa na Halmashauri katika Kata ya Dunda, Mapinga, Yombo, Kisutu na Fukayosi.

Miradi hiyo yenye thamani ya Sh. 571,554,066/= ni ya sekta ya Afya, Elimu Msingi na Sekondari inayotekelezwa na Halmashauri ya Wilaya ya Bagamoyo kutokana na fedha za makusanyo ya ndani, Ruzuku ya miradi ya maendeleo toka Serikali Kuu na michango ya Wananchi na Wahisani mbalimbali.

Katika ukaguzi huo Wajumbe wa kamati hiyo walionesha kuridhirishwa na ubora wa miradi na thamani halisi ya fedha zilizotumika kutekeleza miradi hiyo huku changamoto mbalimbali zilizojitokeza wakati wa utekelezaji wa Miradi hiyo zikibainishwa kuwa mwamko mdogo wa wananchi kuchangia shughuli za maendeleo, ahadi za wadau na wahisani kucheleweshwa ama kutotekelezwa kabisa pia jamii kutoa tafsiri potofu juu ya dhana ya elimu bila malipo.

Miradi iliyotembelewa ni pamoja na Ujenzi wa Kituo cha Afya Matimbwa kilichopo Kata ya Yombo, Ujenzi wa madarasa manne ya Shule mpya ya Sekondari Mapinga na Ujenzi wa madarasa matano ya Shule mpya ya Msingi Kimele zote zilizopo Kata ya Mapinga na Ujenzi wa vyumba vitatu vya madarasa katika Shule ya Msingi Ukuni iliyopo Kata ya Dunda.

Wakati huo huo, miradi minne ya elimu inayotekelezwa na sekta binafsi, imetembelewa na kukaguliwa katika ziara hiyo, miradi hiyo ni pamoja na ujenzi wa Shule ya awali na msingi Holly Family Sisters iliyopo Kata ya Fukayosi, Ujenzi wa Shule mpya ya awali na msingi ya Ef Daniel Boujou iliyopo Kata ya Kisutu na Ujenzi wa Shule mpya ya awali na msingi Baobab iliyopo Kata ya Mapinga.