KAMPENI YA USICHUKULIE POA NYUMBA NI CHOO YATINGA BAGAMOYO

Posted on: August 1st, 2018

Halmashauri ya Wilaya ya Bagamoyo kwa kushirikiana na taasisi ya WEPMO (Water and Environmental Sanitation Projects Maintanance Organisation) zipo katika utekelezaji wa wa mradi wa Uboreshaji wa Afya na Usafi wa Mazingira kwa Halmashauri ya Wilaya ya Bagamoyo.

Mradi huu unatekelezwa katika Kata zote 11 za Halmashauri ambapo Wananchi wanahamasishwa kujenga vyoo bora kwa bei nafuu na kuelimishwa juu ya umuhimu wa kila nyumba kuwa na choo bora.

Mkurugenzi wa Halmashauri ya Wilaya ya Bagamoyo Bi. Fatuma Latu akizungumza katika utambulisho wa mradi huo utakaotekelezwa kupitia kampeni ya “Usichukulie Poa nyumba ni Choo” uliofanyika katika Ofisi za Halmashauri mapema jana amesema, Halmashauri imekuwa ikifanya uhamasishaji huu wa ujenzi wa vyoo bora kupitia Maafisa Afya wa Kata kila mara, ambapo Wananchi wanahimizwa kuwa kila wanapojenga nyumba ni lazima waanze kwa kujenga choo bora kwanza, hivyo anawashukuru sana taasisi ya WEPMO kwa kuja kuongeza nguvu katika uhamasishaji huu wa ujenzi wa vyoo bora.

Akaongeza “Ni lazima kila mmoja afanye wajibu wake, Wataalam wawajengee Wananchi uelewa juu ya ujenzi na utumiaji wa Vyoo bora, pia faida za kuwa na choo bora na hasara za kutokuwa na choo bora, ni vyema Wananchi wakaelewa kwanza kabla Watendaji wa Kata hawajatumia nguvu na sheria kwa watakaokaidi kujenga na kutumia vyoo bora katika kaya zao kwa kuwafungulia mashauri katika mabaraza ya Kata”

Nae mratibu wa mradi huu wa uboreshaji wa Afya na Usafi wa Mazingira katika Halmashauri ya Wilaya ya Bagamoyo, Bw. Renatus Rweyemamu amesema katika utafiti wa awali uliofanywa na taasisi hiyo, hali ya afya na usafi wa mazingira katika Halmashauri ya Wilaya ya Bagamoyo inaonesha 84% pekee ndio Wananchi wenye Kaya zenye vyoo vya kawaida yaani aina yoyote ya choo kinachotenganisha kinyesi na mazingira hata vile visivyosafishika, ilihali, Kaya zenye vyoo vilivyoboreshwa  vyenye kutumia maji na vyenye sakafu inayosafishika ni 50% huku vyoo vyenye Vifaa vya kunawia mikono zikiwa ni 18% tu.

Bw. Rweyemamu anaongeza kuwa lengo la mradi huu Kuongeza ufahamu kwa Wananchi kutambua athari za kujisaidia ovyo katika mazingira na kuamua kuacha kupitia mikakati yao katika kuboresha afya na usafi wa mazingira.