KATIBU MKUU UVUVI AFANYA ZIARA KUKAGUA UJENZI WA OFISI ZA BMU BAGAMOYO

Posted on: November 16th, 2020

Katibu Mkuu wa Wizara ya Mifugo na Uvuvi anayeshughulikia Uvuvi Dkt. Rashid Tamatamah leo Novemba 16, 2020 amefanya ziara maalumu ya kukagua ujenzi wa Ofisi za Vikundi shirikishi vya Ulinzi wa Rasilimali za Uvuvi, (BMU) ili kujionea hatua mradi huo ulipofikia.

Dkt. Tamatamah ametembelea na kukagua Mradi huo unaotekelezwa katika eneo la Dunda zilipokuwepo Ofisi za Idara ya Mifugo na Uvuvi za Halmashauri ya Wilaya ya Bagamoyo, na kuridhishwa na namna utekelezaji wa mradi huo ulivyofanyika pia hatua uliyofikia.

"Nimeridhishwa na namna utekelezaji wa mradi huu ulivyofanyika, na upo katika hatua nzuri, lakini nitumie fursa hii kumtaka Mkandarasi anayetekeleza mradi  kuhakikisha anakamilisha mradi huu kwa wakati na ukiwa katika viwango tunavyotarajia, fedha ipo na hakuna kinachomzuia kukamilisha mradi kwa wakati hivyo ahakikishe anaukamilisha ili uweze kutumika kwa lengo lilikosudiwa" Amesema Dkt. Tamatamah

Ujenzi wa Ofisi za Vikundi shirikishi vya Ulinzi wa rasilimali za Uvuvi ulianza mnamo tarehe 27/07/2020 na unatarajiwa kukamilika na kukabidhiwa tarehe 31/01/2020 huku ukitarajiwa kugharimu jumla ya Shilingi 159,890,000/- na mradi huo unatekelezwa na Kampuni ya ukandarasi ya SIA CONSTRUCTION CO. LTD ya jijini Dar Es Salaam huku wanufaika wa mradi huo wakiwa ni jamii na Halmashauri ya Wilaya ya Bagamoyo