Kikao cha kamati ya sensa wilaya ya Bagamoyo chafanyika.

Posted on: August 9th, 2022

Kikao cha kamati ya sensa wilaya ya Bagamoyo inayohusisha Halmashauri mbili  ambazo ni Chalinze na Bagamoyo kimefanyika leo katika ofisi ya Mkuu wa wilaya ya Bagamoyo chini ya uenyekiti wa Mkuu wa wilaya hiyo Mheshimiwa Zainab Abdallah Issa ambaye ndiye mwenyekiti wa kamati ya sensa wilaya kwa mujibu wa mwongozo.

Kikao cha kamati ya sensa kimefanyika ili kufanya tathmini ya mwenendo mzima wa maandalizi ya zoezi la sensa na hali halisi ya mwenendo wa mafunzo ya wataalam na makarani watakao shiriki zoezi hili adhimu la serikali siku ya tarehe 23 Agosti mwaka huu.

Wakitoa taarifa ya zoezi hilo waratibu wa sensa ya watu na makazi kwa halmashauri zote mbili walieleza jumla ya makarani 991 wanaendelea na mafunzo kwa siku 15 katika halmashauri ya Chalinze na makarani 418 wanaendelea na mafunzo kwa hamashauri ya Bagamoyo. Katika kikao hicho wajumbe wamekubaliana kwa pamoja kuhakikisha wananchi wanahamasishwa kushiriki katika zoezi la sensa kupitia michezo mbalimbali pia kupitia vyombo vya habari na mitandao ya kijamii.

Aidha katika kikao hicho wajumbe walikubaliana kuwa wenyeviti wa vitongoji wahakikishe wanahamasisha wananchi kushiriki kikamilifu katika zoezi la sensa na kutoa ushirikiano wa hali ya juu kwa makarani katika kuwaongoza kuwafikia wananchi.

Mwisho Mheshimiwa Mkuu wa wilaya alizitaka halmashauri zote mbili yaani Bagamoyo na Chalinze kuandaa matamasha yatakayo hamasisha wananchi kushiriki katika kuhesabiwa kwa kuwashirikisha wasanii mbalimbali kabla ya siku ya sensa hapo 23 Agosti.