KITUO CHA AFYA KEREGE KUANZA KUTOA HUDUMA ZA UPASUAJI HIVI KARIBUNI

Posted on: May 25th, 2018

Kituo kipya cha Afya Kerege kilichojengwa kwa ufadhili wa Serikali kuu mapema mwishoni mwa mwaka jana (2017) kitaanza rasmi kutoa huduma za upasuji hivi karibuni.

Mkurugenzi wa Halmashauri ya Wilaya ya Bagamoyo Bi. Fatuma Latu ameyasema hayo leo jioni ya leo tarehe 25. 05. 2018 alipokuwa akizungumza na wageni mbalimbali aliowaalika futari maalum aliyowaandalia wadau hao kwa kutambua mchango wao mkubwa katika kufanikisha maendeleo ya Halmashauri ya Wilaya ya Bagamoyo.

Amesema Halmashauri ya Wilaya ya Bagamoyo imejenga kituo bora kabisa cha Afya nchini baada ya kufadhiliwa jumla ya Tshs.Milioni 500 na Serikali kuu na kujenga kituo hicho cha Afya Kerege kwa kutumia “Force account” na tayari kimeanza kutoa huduma za kuzalisha wakina Mama na huduma nyingine muhimu za kiafya na huduma ya upasuaji itaanza kutolewa mara tu baada ya kukamilika kwa ununuzi wa vifaa tiba katika Kituo hicho cha Afya.

Ujenzi wa kituo cha afya kerege ulianza tarehe 20/10/2017 na lengo kuu la mradi likiwa ni kuboresha vituo vya afya nchini na kuwa na vituo vya afya vyenye ufanisi.

Bi. Latu anasema hadi sasa Kituo cha Afya Kerege kimejenga na kukamilisha Jengo la upasuaji, Jengo la wazazi, Nyumba ya mtumishi, Jengo la maabara, Jengo kwa ajili ya mfumo wa umeme na jenereta, Mashimo mawili ya kuvunia maji, Minara miwili ya kuvunia maji yenye vyoo na stoo chini, Kichomea taka huku Jengo la kufulia nguo na Jengo la kuhifadhia maiti yakiwa katika hatua za ukamilishaji.

Akaongeza, Mradi ulikadiriwa kugharimu jumla ya Tsh 544, 000,000.00 ambapo kiasi cha Tshs 500, 000,000.00 ilipokelewa kutoka OR-TAMISEMI na kiasi cha Tshs. 44,000,000 ni mchango wa Halmashauri.

Hadi sasa kiasi cha Tsh 478, 000,000.00 zimetumika ambapo kiasi cha Tshs 460, 000,000.00 kimetumika katika ujenzi na Tshs 18, 000,000 kimetumika katika shughuli za usimamizi wa mradi.

Kukamilika kwa mradi huu kutawezesha kutolewa kwa huduma za Afya kwa ufanisi zaidi zikiwemo huduma za dharura na kufanya upasuaji hasa kwa akina Mama wajawazito wakati wa kujifungua lakini pia upasuaji wa kawaida kwa wagonjwa wengine watakaohitajika kupata huduma hiyo.

Kituo cha Afya Kerege kina uwezo wa kutoa huduma kwa Jumla ya wananchi 7,114 wa Kata ya Kerege lakini kinatarajiwa pia kuhudumia wakazi wa Kata jirani.

Akaongeza kuwa baada ya kutekeleza mradi huu wa ujenzi wa Kituo cha Afya Kerege kwa ufanisi mkubwa, Serikali na wadau wengine wa maendeleo wamesema wapo tayari kufadhili miradi mikubwa ya maendeleo ndani ya Halmashauri ya Wilaya ya Bagamoyo ambayo ni Ujenzi wa stendi mpya na ya kisasa ya mabasi na Soko jipya la kisasa la samaki katika pwani ya Bagamoyo.

Wadau mbalimbali wa Halmashauri wapatao 200, ikiwa ni pamoja na Waheshimiwa Madiwani wa Halmashauri ya Wilaya ya Bagamoyo, wakuu wa Idara, Viongozi wa jumuiya ya kuendeleza na kutunza Amani, Viongozi wa dini, Viongozi wa taasisi za kifedha, Viongozi wa taasisi zingine za Serikali ndani ya Halmashauri na asasi zisizo za Kiserikali, Viongozi wa Wanawake, Wazee na watu wenye ulemavu, na Watumishi wa Halmashauri walipata fursa ya kuketi pamoja katika viunga vya Halmashauri ya Wilaya ya Bagamoyo na kufuturu pamoja.