KITUO KIPYA CHA AFYA MATIMBWA KUKAMILIKA OKTOBA 2018

Posted on: September 18th, 2018

Mradi wa Ujenzi wa Kituo cha Afya Matimbwa unatarajiwa kupunguza kwa kiasi kikubwa msongamano wa Wagonjwa katika Hospitali ya Wilaya ya Bagamoyo na hivyo kuboresha utoaji wa huduma za Afya katika Halmashauri ya Wilaya ya Bagamoyo.

Ujenzi wa kituo cha Afya Matimbwa, kilichopo katika Kata ya Yombo, Wilayani Bagamoyo, ni mradi unaotekelezwa kwa fedha zilizotolewa na Serikali kuu chini ya Ofisi ya Rais TAMISEMI, kiasi cha Shilingi za Kitanzania Milioni 400, zilizopokelewa Halmashauri ya Wilaya ya Bagamoyo mnamo tarehe 27/06/2018.

Mradi wa ujenzi wa Kituo cha Afya Matimbwa ulianza rasmi utekelezaji wake mnamo tarehe 26 Julai, 2018 na unatekelezwa chini ya utaratibu wa ‘force account’ yaani kutumia mafundi wa kawaida wa ndani wakiwa chini ya usimamizi wa Muhandisi Mkuu wa Halmashauri.

Hadi sasa majengo matatu yanaendelea kujengwa katika mradi huu, ambayo ni Nyumba ya Mtumishi, Maabara na jengo la tatu ni jengo ambalo limeunganishwa majengo mawili ambayo ni wodi ya wazazi na jengo la upasuaji.

Majengo yote yapo katika hatua za ukamilishaji kwani yamefikia hatua ya kupigwa plasta baada ya kumaliza hatua ya kupauliwa.

Mradi wa ujenzi wa kituo cha Afya Matimbwa utakapokamilika unatarajiwa kutoa huduma kwa wakazi wa Kata ya Matimbwa na Kata jirani za Fukayosi, Makurunge, na Kiromo.

Ujenzi wa Kituo cha Afya Matimbwa unatekelezwa kwa kufuata utaratibu wa“force account”  ambao ni utaratibu wa ujenzi wa majengo ya umma kwa taasisi nunuzi kutumia wataalamu wake yenyewe.

Mradi wa ujenzi wa kituo cha Afya Matimbwa unatarajiwa kukamilika tarehe 30/10/2018 na kuanza kutoa huduma kwa Wananchi wa Bagamoyo wanaoishi jirani na Kituo hicho cha Afya na ni mradi wa pili wa Kituo cha Afya kutekelezwa na Serikali Kuu chini ya Ofisi ya Rais TAMISEMI baada ya kukamilika kwa mradi wa kwanza wa Ujenzi wa Kituo cha Afya Kerege uliotekelezwa katika Kata ya Kerege, Wilayani Bagamoyo.