KLINIKI MKOBA YA MAMA NA MTOTO SASA KUPATIKANA MTAANI

Posted on: February 25th, 2020

Huduma ya kliniki tembezi ‘mkoba’ ya mama na mtoto (RCH), ambayo imezoeleka kutolewa katika zahanati, vituo vya Afya na Hospitali ya Wilaya ya Bagamoyo, sasa imeanza kutolewa ngazi ya Vitongoji mara moja kila mwezi.

Kuanza kwa huduma za RCH mkoba katika Vitongoji ambavyo huduma za Afya hazipatikani kwa urahisi utarahisisha utoaji huduma za kliniki ya mama na mtoto na kuwapunguzia wakina mama usumbufu wa kufuata huduma hiyo Hospitali ya Wilaya ya Bagamoyo au Zahanati zilizo mbali na makazi yao.

Zoezi hilo ambalo leo limefanyika katika Ofisi ya Kitongoji cha Sanzale, Kata ya Magomeni, limejumuisha utoaji elimu ya lishe bora kwa mama na mtoto, ambapo Afisa Lishe (W) Bi. Sofia Makame kwa kushirikiana na wataalam wengine wa Afya wametoa elimu kwa Wananchi takribani 80 wa kitongoji hicho.

“Lishe bora kwa mama na mtoto katika siku 1000 za mwanzo za maisha ya mtoto ni suala la muhimu sana, tangu mama anaposhika ujauzito hadi mtoto anapotimiza miaka 2,  ni siku 1000 za mwanzo za maisha ya mtoto ambazo ni lazima lishe ya mtoto huyu izingatiwe tangu anapokuwa tumboni kwa mama, kuhakikisha anakula chakula bora ili mtoto huyu azaliwe mwenye afya njema na aendelee kupatiwa chakula bora hadi atakapotimiza umri wa miaka 2 kwani huu ndio muda ambao afya ya mwili na akili ya mtoto hujengwa” Amesema Bi. Sofia

Kliniki mkoba hii pia imetumika kutoa elimu juu ya namna ya kuandaa chakula bora chenye lishe kamili kwa watoto walio chini ya miaka 5, dalili za utapiamlo, madhara ya utapiamlo na matibabu yake.

Vile vile huduma zingine zilizotolewa ni pamoja na huduma za chanjo kwa watoto walio chini ya miaka 05, upimaji hali ya lishe kwa watoto hao, matone ya Vitamini A, dawa za minyoo na huduma za uzazi wa mpango kwa wanawake na wanaume waliohitaji huduma hiyo.