KLINIKI YA SIKOSELI YAANZISHWA HOSPITALI YA WILAYA YA BAGAMOYO

Posted on: September 14th, 2020

Ikiwa ni miezi miwili tu imepita tangu Serikali kuzindua mwongozo wa Taifa wa matibabu kwa watu wenye ugonjwa wa sikoseli mnamo Juni 19,2020 huku Waziri wa Afya, Maendeleo ya Jamii, Jinsia, Wazee na Watoto, Mhe. Ummy Mwalimu akiagiza kuanzishwa kwa kliniki maalumu za kuchunguza ugonjwa huo katika ngazi ya wilaya na mikoa ili kuhakikisha watu wengi hasa watoto wanafikiwa, Timu ya Wataalam wa Afya kutoka Chuo cha Afya Muhimbili (MUHAS) program ya selimundu wakiongozwa na Dkt. Agnes Jonathan, leo wameanza rasmi utoaji huduma katika kliniki maalum kwa wagonjwa wa sikoseli katika Hospitali y Wilaya ya Bagamoyo ili kusaidia wakazi wa Bagamoyo kupata huduma ya utambuzi ya ugonjwa wa sikoseli kwa ukaribu zaidi.

Uzinduzi wa utoaji huduma hizo katika Hospitali ya Wilaya ya Bagamoyo umefanyika leo Septemba 14, 2020, hospitalini hapo ambapo Kaimu Mganga Mkuu Wilaya ya Bagamoyo, Ndg. Mohamed Farah pamoja na kuwashukuru wataalam hao waliofika kutoa huduma ya kliniki ya sikoseli, amesema hii ni fursa adhimu kwa Wananchi na wakazi wa Bagamoyo kufika Hospitalini hapo ili kupata huduma hiyo na kwamba baada ya uzinduzi huo kliniki itakuwa wazi kwa wagonjwa wa sikoseli kila siku ya jumatatu kuanzia leo na jumatatu zijazo.

Mratibu wa program ya sikoseli toka Chuo Kikuu cha Afya Muhimbili (MUHAS) Dkt. Agnes Jonathan aliyeongoza timu ya wataalam kutoka Muhimbili waliofika Bagamoyo kuendesha kliniki kwa wagonjwa wa Sikoseli ametoa mafunzo maalum kwa wazazi wenye watoto walio na tatizo la sikoseli juu ya namna ya kuutambua ugonjwa huo, dalili zake, athari na viashiria vya hatari ambavyo mzazi anapoviona amuwahishe mtoto wake Hospitalini kwa matibabu zaidi bila kungoja siku ya kliniki.

“Jamii imekua na dhana potofu juu ya ugonjwa wa sikoseli, leo ni vema mkafahamu kwamba ugonjwa huu ni wa kuithi pale wenza wawili wenye vinasaba vya ugonjwa huu wanapopata mtoto, mtoto huyo anaweza kupata ugonjwa wa sikoseli ambao mara nyingi hutambulika mara mtoto anapofikisha umri wa miezi 6, kwa kupata tatizo la upungufu wa damu mara kwa mara, lakini ni vema zaidi mkitambua kuwa ugonjwa huu unaweza kudhibitiwa kwa kufuata masharti yanayotolewa na wataalamu wa Afya ikiwa ni pamoja na unywaji wa maji mengi walau lita 3 kila siku, kuzingatia lishe bora na kuhudhuria kliniki ambayo sasa kwa Bagamoyo huduma imesogezwa kwani kliniki hiyo itakuwa inafanyika kila siku ya Jumatatu katika Hospitali ya Wilaya ya Bagamoyo” Amesema Dkt. Agnes

Nae. Bi. Arafa Said Mwanzilishi na Rais wa Asasi isiyo ya Kiserikali iitwayo Sickle Cell Disease Patients Community of Tanzania ambaye ameongozana na wataalam hao katika uzinduzi huo amewatia moyo wazazi wenye watoto wenye tatizo la selimundu kwani pamoja na yeye kuishi na ugonjwa wa sikoseli lakini kwa kuzingatia ushauri wa Wataalam wa Afya ameweza kuendelea na maisha yake hata kufikia hatua ya kuwa na familia.

Mwongozo wa Taifa wa matibabu kwa watu wenye ugonjwa wa Sikoseli, ulizinduliwa rasmi Juni 19,2020 na Waziri wa Afya, Maendeleo ya Jamii, Jinsia, Wazee na Watoto, Mhe. Ummy Mwalimu katika Hospitali ya Taifa ya Muhimbili ukiwa na kauli mbiu inayosema “Huduma Bora kwa Kila Mhitaji; Chukua hatua, panua wigo.” na katika kutekeleza kauli mbiu hiyo, Wataalam toka Chuo cha Afya Muhimbili (MUHAS) wameanza kuzifikia Halmashauri za Wilaya na kuanzisha kliniki za wagonjwa wa sikoseli huku Halmashauri ya Wilaya ya Bagamoyo ikiwa ni moja ya Halmashauri za mwanzoni kunufaika na utaratibu huo.