RAS PWANI AWATAKA WATUMISHI KUONGEZA NGUVU KATIKA UKUSANYAJI MAPATO

Posted on: September 12th, 2018

Hayo yamesemwa na Katibu Tawala wa Mkoa wa Pwani, Bi. Theresia Mmbando, alipokuwa akizungumza na watumishi wa Halmashauri ya Wilaya ya Bagamoyo, katika kikao maalumu cha kujitambulisha kwa Watumishi, kikao kilichofanyika katika Ukumbi wa Halmashauri ya Wilaya ya Bagamoyo mapema jana asubuhi.

Bi. Mmbando amesisitiza kuwa kipaumbele cha sasa cha Serikali ya awamu ya tano chini ya Uongozi wa Mhe. Rais John Joseph Pombe Magufuli ni kuhakikisha Serikali inakusanya mapato kwa nguvu na kwa ufanisi.

“Hakikisheni mnakusanya mapato kama ilivyopangwa na kufikia malengo mliyojiwekea kama Halmashauri katika kukusanya mapato ya ndani katika Mwaka huu wa fedha, fuatilieni ufujaji wa mapato katika vyanzo vyenu na hakikisheni mnaziba mianya yote ya ufujaji kwa kuwachukulia hatua kali wote watakaobainika kujihusisha na ufujaji wa mapato” Anasema Bi. Mmbando.

Anaongeza kusema kuwa, ili Halmashauri ipate uwezo wa kujiendesha vizuri, ni lazima ukusanyaji wa mapato ya ndani uwe ni wa uhakika, hivyo kuwataka Watumishi kutoa ushirikiano mkubwa kwa Mkurugenzi wa Halmashauri, kukusanya mapato ya Halmashauri kwa nguvu zote.

Bi. Mmbando pia ametumia fursa hiyo kuelezea vipaumbele vya Serikali na kusisitiza uwajibikaji unaozingatia weledi kwa watumishi, bila kusubiri kusukumwa na viongozi ili kuhakikisha wanamaliza kero na malalamiko ya Wananchi kwa wakati.

Kupitia kikao hicho Bi. Mmbando pia amesikiliza kero wanazokutana nazo watumishi wakiwa katika utekelezaji wa majukumu yao ya ila siku, kero ambazo zilitolewa ufafanuzi wa kina na Afisa utumishi wa Halmashauri Bw. George Mwalukasa.

Kero zilizowasilishwa na watumishi ni pamoja na ucheleweshwaji wa kupandishwa madaraja, kutolipwa stahili za posho za likizo, kutopitishiwa barua za uhamisho na wakuu wao wa Idara wanapohitaji kuomba uhamisho, kucheleweshwa kwa malipo ya mishahara ya watumishi wanaolipwa kupitia mapato ya ndani, kuchelewa kwa malipo ya fedha za kujikimu kwa waajiriwa wapya, upungufu mkubwa wa watumishi wa kada ya Afya unaopelekea utoaji hafifu wa huduma katika Hospitali ya Wilaya na watumishi wanaohitaji kubadilishiwa muundo wa utumishi.

Katibu Tawala Mkoa wa Pwani, Bi. Theresia Mmbando yupo katika ziara maalumu ya kujitambulisha kwa Watumishi wa Halmashauri za Mkoa wa Pwani, baada ya kuteuliwa na Mhe. Rais wa Jamuhuri ya Muungano wa Tanzania, Dkt. John Joseph Pombe Magufuli, kuwa Katibu Tawala wa Mkoa wa Pwani akitokea Mkoa wa Dar Es Salaam.