MAADHIMISHO YA SIKU YA UKIMWI DUNIANIYAFANYIKA KWA MAFANIKIO BAGAMOYO

Posted on: December 4th, 2018

Maadhimisho ya siku ya UKIMWI duniani, yamefanyika kwa mafanikio siku ya Jumamosi tarehe 01 Desemba, 2018 katika viwanja vya shule ya msingi majengo, huku mgeni rasmi akiwa ni Mkuu wa Wilaya ya Bagamoyo Bi. Zainab Kawawa.

Maadhimisho hayo yaliyopambwa na burudani mbalimbali toka vikundi vya sanaa vya TASUBA, BAYOICE na wanafunzi wa shule ya msingi Jitegemee zilizolenga kutoa ujumbe juu ya kujikinga na maambukizi mapya ya UKIMWI na kuepuka unyanyapaa yalibebwa na kauli mbiu isemayo "PIMA, JITAMBUE, ISHI"

Akizungumza na Wananchi, Mkuu wa Wilaya ya Bagamoyo, Mhe. Zainab Kawawa ametoa rai kuwa kila Mwananchi ajijengee tabia ya kupima maambukizi ya virusi vya UKIMWI mara kwa mara ili kujua hali yake kiafya na wanapokutwa na maambukizi basi waanze matibabu ya kufubaza makali ya virusi vya UKIMWI mara moja na kujitahidi kuepuka kuwaambukiza wengine kwa kukusudia, na kuongeza kwamba Serikali itakuwa nao bega bega kuwahudumia kwa kuhakikisha wanapata huduma bora za AFYA.

"Nitoe rai kwa Wananchi wenzangu wa Bagamoyo, kuhakikisha kuwa tunashiriki kwa pamoja katika mapambano dhidi ya UKIMWI kwa kuelimishana sisi kwa sisi juu ya madhara ya UKIMWI, tuwaelimishe watoto wetu na tuwalinde dhidi ya maambukizi ya virusi vya UKIMWI, Kila Kata na Kijiji iweke utaratibu wa kuwajengea uwezo watoto wetu juu ya elimu ya kujilinda dhidi ya maabukizi ya UKIMWI" Amesema Mhe. Zainab.

Maadhimisho ya Siku ya UKIMWI duniani yameenda sambamba na maadhimisho ya Mwezi wa Lishe Kiwilaya ambayo yamejikita katika kuhakikisha kila mtoto mwenye umri chini ya miaka mitano, katika Mwezi Desemba anapatiwa matone ya vitamin A, dawa za minyoo na kupimwa hali ya lishe katika vituo vyote vya kutolea huduma za Afya katika Halmashauri ya Wilaya ya Bagamoyo