MADIWANI HALMASHAURI YA BAGAMOYO WABARIKI TAARIFA ZA HESABU ZA MWISHO KWA MWAKA 2021/2022.

Posted on: September 28th, 2022

Halmashauri ya Wilaya ya Bagamoyo ikiongozwa na Mwenyekiti wake wa Halmashauri Mhe. Mohamedi Usinga ameongoza  Mkutano Maalumu wa Baraza la Madiwani kwa ajili ya kujadili na kupitisha Taarifa za Hesabu za Mwisho za Halmashauri ya wilaya ya Bagamoyo kwa mwaka wa fedha 2021/2022 uliofanyika leo Jumatano Septemba 28,2022 katika ukumbi wa mikutano wa Halmashauri  hiyo.

Katika mkutano huo, Waheshimiwa Madiwani wameruhusu Mchakato wa ufungaji wa Ripoti za Hesabu za Mwisho za Halmashauri ya wilaya ya Bagamoyo kwa mwaka wa fedha 2021/2022 zilizoishia Juni 30,2022 uendelee kwa ajili ya kuwasilisha katika Ofisi ya Ukaguzi ya Taifa.

Halmashauri ya Wilaya ya Bagamoyo imeandaa hesabu za mwisho za mwaka kwa kipindi cha 2021/22 hesabu hizo zimeandaliwa kwa kuzingatia viwango vya kimataifa kwa hesabu za sekta ya umma na miongozo mbalimbali inayotolewa na QR-Tamisemi  na waraka namba 1 wa Wizara ya Fedha na Mipango wa uandaaji hesabu za mwisho kwa mwaka wa fedha huku pia taarifa hizo ziisomeka katika mfumo wa ulipaji serikalini (muse).

Halmashauri ya Wilaya ya Bagamoyo ina jumla ya wahe madiwani 15 ambapo katika hao madiwani 11 wakuchaguliwa na madiwani 4 wakuteuliwa Pamoja na Mhe mbunge 1 ambao wapo katika madaraka hayo kwa kipindi cha miaka 5.

Aidha katika kipindi cha mwaka 2021/22 Baraza la madiwani likiongozwa na Mhe Mohamed Usinga limeketi katika vikao vyake mbalimbali vya kawaida kwa kila robo ya mwaka na vikao maalum kwa ajili ya kuamua mambo muhimu yanayohusu uongozi na utawala bora.

Pia Halmashauri kupitia kamati zake mbalimbali kwa mwaka wa fedha 2021/22 imetekeleza shughuli zake kama zilivyoshauriwa na kutekelezwa na kamati za Elimu,Afya na maji,Kamati ya Uchumi,Ujenzi na Mazingira,kamati ya kudhibiti ukimwi Pamoja na kamati ya maadili.

Sanjari na hayo kamati ya ukaguzi ya Halmashauri yenye wajumbe 5 iliketi katika vipindi vyake vya utekelezaji wa majukumu yake kupitia vikao vya kila robo ya mwaka na vikao maalum vilivyotakiwa kufanyika katika mwaka wa fedha 2021/22 kamati imekuwa ikishauri kitaalamu mambo yote muhimu ya Halmashauri ikiwemo taarifa ya Fedha,Uongozi na Mipango ufatiliaji wa sheria kanuni na miongozo mbalimbali iliyotumika katika Halmashauri.