MADIWANI WAFANYA USAFI SOKO LA SAMAKI PWANI KUADHIMISHA SIKU YA MAZINGIRA

Posted on: June 6th, 2018

Tarehe 05 June, kila mwaka Watanzania huungana na Nchi nyingine Duniani kuadhimisha Siku ya Mazingira Duniani, siku iliyoanza kuadhimishwa baada ya mkutano wa kwanza wa Umoja wa mataifa uliohusu mazingira uliofanyika Nchini Sweden katika mji wa Stockholm mnamo mwaka 1972.

Halmashauri ya Wilaya ya Bagamoyo kwa kuzingatia umuhimu wa utunzaji wa Mazingira, imeungana na mataifa mengine kote Duniani na Wananchi wengine kote nchini kuadhimisha Siku ya Mazingira Duniani kwa kufanya usafi katika soko la samaki la pwani.

Viongozi wa Halmashauri wakiwemo Madiwani, Mkurugenzi Mtendaji wa Halmashauri, Wakuu wa Idara na Vitengo wa Halmashauri, waliungana na Wananchi na Wafanya biashara wa wanaofanya shughuli zao katika Soko la Samaki la Pwani kufanya usafi katika maeneo hayo ya Pwani mapema jana asubuhi.

Maadhimisho haya yalipambwa na kauli mbiu ya Kitaifa inayosema “Mkaa Gharama; Tumia Nishati Mbadala” Kauli mbiu iliyowekwa na Serikali kutokana na kiasi kikubwa cha maeneo ya misitu kuharibiwa na Wananchi kwa ajili ya utengenezaji wa Mkaa.

Mkurugenzi wa Halmashauri ya Wilaya ya Bagamoyo Bi. Fatuma Latu ambae ameongoza katika maadhimisho hayo amewaongoza Wahe.Madiwani kufanya usafi katika eneo hilo la Soko la samaki amesema “ Bagamoyo kama ilivyo katika maeneo mengine ya Nchi yetu pia imeathiriwa na mabadiliko ya tabia nchi, ambapo athari zake ni kuongezeka kwa mawimbi ya bahari na ujazo wa bahari unaopelekea kubomoka kwa kingo za fukwe za bahari.

Anaongeza, Wilaya yetu ina ongezeko kubwa la wimbi la uchimbaji holela wa mchanga, matumizi makubwa ya mifuko ya plastiki na utupaji wa taka hovyo katika maeneo yasiyo rasmi, hii imesababisha mji wetu wenye sifa kubwa ya utalii uonekane mchafu hali hii inatakiwa ikemewe ili kunusuru mazingira yetu.

Akatoa wito kwa Wafanya biashara wanaofanya shughuli zao katika soko hilo, wavuvi na Wananchi wanaotembelea ufukwe huo na eneo hilo la soko la samaki kujenga hulka ya kutunza mazingira kwa kuacha tabia ya kutupa taka hovyo ma hasa taka ngumu kama chupa za plastiki na mifuko ya nailoni taka zinazochangia kwa kiasi kikubwa uharibifu wa mali hai za bahari kama vile samaki na kutishia uzalishaji wake baharini.