MAFUNZO KWA WASIMAMIZI WA UCHAGUZI MKUU BAGAMOYO YAANZA KUTOLEWA RASMI LEO

Posted on: October 24th, 2020

Ikiwa ni siku 03 tu zimebaki kabla ya Taifa la Tanzania kufanya Uchaguzi Mkuu wa Viongozi wa Taifa wakiongozwa na Mhe Rais wa Jamhuri ya Muungano wa Tanzania, Wabunge na Madiwani wa Mamlaka za Serikali za Mitaa, Mafunzo maalum yameanza kutolewa kwa Wasimamizi wa Uchaguzi huo ambao ni Makarani waongoza wapiga Kura na wasimamizi na Wasimamizi wasaidizi wa Vituo vya kupigia Kura Wilayani Bagamoyo.

Mafunzo hayo yameanza kutolewa rasmi leo Oktoba 24, 2020 kwa Makarani waongoza wapiga kura wa Vituo vyote vitakavyotumika kupigia Kura katika Jimbo la Bagamoyo na yamefunguliwa na Msimamizi wa Uchaguzi Jimbo la Bagamoyo Bi. Fatuma O. Latu, yakitarajiwa kufanyika katika Kata zote 11 za Jimbo la Bagamoyo.

“Mna wajibu mkubwa wa kisheria kuwaongoza wapiga Kura wafikapo katika Vituo vyao vya kupigia kura, kuwaelekeza nini cha kufanya wawapo kituoni na kuhakikisha kila nayefika katika Kituo cha kupigia Kura anapata haki yake ya kikatiba ya kupiga kura kumchagua kiongozi anayemtaka” Amesema Bi. Fatuma

Bi. Fatuma Latu Anaongeza, Makarani waongoza wapiga kura wapo kisheria katika Sheria ya Uchaguzi na Miongozo ya Tume ya Taifa ya Uchaguzi Nchini, hivyo kwa kutambua hilo nina Imani mtafanya kazi hii kwa weledi, kwa kuzingatia na kufuata sharia, kanuni na taratibu za Uchaguzi Mkuu, nasisitiza umahiri, kuimiliki kazi hii muwapo vituoni na muifanye kwa kadiri ya maelekezo mtakayopewa leo hapa bila kusahau kuzingatia kutunza siri kwani zoezi la uchaguzi ni zoezi linalohitaji usiri mkubwa na ndio sababu leo mmeapa kiapo cha kutunza siri kabla ya kuanza mafunzo haya.

Msimamizi wa Uchaguzi wa Kata ya Magomeni Bi. Mwajuma Selemani Yombe pia amezungumza katika mafunzo hayo ambayo kwa Kata ya Magomeni yamefanyika katika ukumbi wa Green Park, na kusisitiza Makarani hao kutekeleza majukumu yao kwa weledi, haki na kuhakikisha wanatoa kipaumbele kwa wapiga kura wenye mahitaji maalum kama vile Wazee, wenye ulemavu, Wajawazito na Wanawake wanaonyonyesha.

Mafunzo kwa wasimamizi na wasimamizi wasaidizi wa Vituo vya Uchaguzi katika Jimbo la Bagamoyo yataendelea tarehe 25- 26 Oktoba, 2020 katika Kata zote 11 za Jimbo la Bagamoyo