MAONESHO YA WIKI YA WAJASIRIAMALI WANAWAKE YAZINDULIWA RASMI WILAYANI BAGAMOYO.

Posted on: December 20th, 2017

Wanawake wajasiriamali Wilayani Bagamoyo kupitia jukwaa la Uwezeshwaji Wanawake kiuchumi Wilaya, wameandaa maonesho ya siku sita ya bidhaa mbali mbali  wanazozalisha kupitia vikundi vidogo vidogo vya uzalishaji mali.

Maonesho hayo yaliyoanza rasmi tarehe 20 na kutarajiwa kufanyika hadi tarehe 25 Desemba, 2017 katika uwanja wa  Mwanakalenge uliopo Bagamoyo mjini,  yamezinduliwa na mgeni rasmi Bi.  Leila Abdul Jumaa ambaye ni Mwenyekiti wa UWT Wilaya ya Kibaha.

Bidhaa mbalimbali zitokanazo na ufumaji, ususi, usindikaji, upishi na ushonaji zinazotengenezwa na vikundi vya Wanawake Wilayani Bagamoyo zitaoneshwa kupitia maonesho hayo.

Nae Mgeni Rasmi kwenye maonesho hayo, Bi. Leila Abdul Jumaa amewataka Wanawake Wilayani Bagamoyo kuamka na kujiunga katika vikundi vya ujasiriamali ili waweze kujipatia ujuzi na kushiriki katika shughuli za kijasiriamali zitakazowaongezea kipato, kuinua uchumi wa mmoja mmoja na kuwapunguzia makali ya maisha.

Jukwaa la uwezeshaji Wanawake kiuchumi Wilayani Bagamoyo lilizinduliwa rasmi Tarehe 05/07/2017 ikiwa ni utekelezaji wa agizo la Mheshimiwa Makamu wa Rais, Mama Samia Hassan Suluhu alilolitoa kwa Mikoa yote ya  Tanzania bara.