MAPINGA YAIBUKA KIDEDEA USAFI WA MAZINGIRA

Posted on: September 21st, 2018

Kata ya Mapinga imeibuka kidedea kwa kushika nafasi ya kwanza katika mashindano ya Usafi wa mazingira yaliyoendeshwa chini ya Idara ya Afya na usafi wa mazingira ya Halmashauri ya Wilaya ya Bagamoyo.

Mashindano hayo yaliyodhaminiwa na kampeni ya usichukulie poa nyumba ni choo, yaliendeshwa katika Kata 5 za Halmashauri ya Wilaya ya bagamoyo, ambazo ni kata ya Mapinga, Kerege, Yombo, Magomeni na Dunda.

Akizunguzumzia namna mashindano hayo yalivyoendeshwa, Afisa Afya Wilaya ya Bagamoyo, Bi Anna Chiganga amesema ili kumpata mshindi walizingatia vigezo vya uwepo wa dampo katika kata, uwasilishaji wa taarifa za usafi wa mazingira kutoka Kata kuja Wilayani, Idadi ya nyumba bora zenye vyoo bora vya kudumu katika Kaya ndani ya Kata, namna sharia ndogo za usafi wa mazingira zinavyotekelezwa katika Kata na mwisho ni miundo mbinu ya usafi kama mifereji ya kupitisha maji taka nk.

“Ni dhamira yetu kuuona mji wa bagamoyo ukiwa safi na Wananchi wakipewa elimu ya kutosha juu ya kuishi katika mazingira safi hususani kuwa na choo bora na sehemu ya kunawa mikono yenye chombo kinachotiririsha maji, hii itasaidia sana kuepuka magonjwa ya mlipuko kama kipindu pindu, homa na maradhi mengineyo yatokanayo na kuishi katika mazingira machafu lakini pia kuwa na Bagamoyo safi” Anasema Bi. Chiganga.

Anaongeza kuwa Lengo la mashindano haya ya usafi ya Kata, ni kuamsha ari ya Wananchi kufanya usafi bila kusukumwa na kufanya usafi kuwai tabia huku akibainisha kwamba kwa mwaka ujao wamejipanga kufanya mashindano hayo katika Kata zote 11 za Halmashauri.

Bi. Chiganga anasema, kupitia mashindano hayo ya usafi wamebaini changamoto kadhaa ikiwemo ya Wananchi kudhani jukumu la kufanya usafi wa amzingira si lao bali ni la Serikali, hususani kuwajengea vyoo bora, lakini wamejipanga kuhakikisha Wananchi hawa wanajengewa uelewa kuhusu masuala ya usafi na baada ya hapo wataanza kuchukua hatua kwa wote wataoendelea kukaidi kufanya usafi wa mazingira uanayowazunguka na kugoma kujenga choo bora kwa kuwapiga faini na kuwapeleka katika mabaraza ya Kata.

Ushindi wa kwanza katika mashindano hayo ya usafi ya Kata, ulichukuliwa na Kata ya Mapinga ambao wamezawadiwa toroli 2, Viatu vya kufanyia usafi “boots” jozi 4, Fagio laini 2, Fagio ngumu 2 na cheti cha ushiriki, huku nafasi ya pili ikishikwa na Kata ya Dunda, ikifuatiwa na Kata za Magomeni nafasi ya 3, Kerege nafasi ya 4 na Yombo kushika nafasi ya 5.