MILIONI 30 KUNUFAISHA VIKUNDI 30 VYA WAJASIRIAMALI

Posted on: October 28th, 2019

Mbunge wa Jimbo la Bagamoyo, Mhe. Shukuru Kawambwa leo amekabidhi fedha kiasi cha Shilingi Milioni 30, 801,000 kwa Vikundi 30 vya vikundi vya wajasiriamali wanawake, Vijana na Wazee ili ziwasaidie katika shughuli zao za ujasiriamali.

Hafla ya kukabidhi Fedha hizo ambazo ni ruzuku toka mfuko wa Jimbo, imefanyika mapema leo katika ukumbi wa Halmashauri ya Wilaya ya Bagamoyo ambapo wawakilishi wa vikundi vilivyonufaika vimekabidhiwa fedha hizo ikiwa ni utaratibu wa kawaida wa Mbunge wa Jimbo la Bagamoyo kugawa fedha za mfuko wa jimbo kwa vikundi vya wajasiriamali wadogo kwa ajili ya kuchochea maendeleo katika shughuli za kiuchumi wanazofanya.

“Katika ugawaji wa fedha hizi kila kikundi kimeangaliwa vizuri, vikundi vya vijana, wazee na wanawake, hakukuwa na ubaguzi, lengo likiwa ni kuhakikisha tunawafikia walengwa na kuwasaidia kuzifikia ndoto zao kwa kuwawezesha kidogo ili twende mbele pamoja kiuchumi” Amesema Mhe. Kawambwa.

Ameongeza kuwa, baada ya ugawaji wa fedha hizo, atashirikiana na Waheshimiwa Madiwani na Wataalamu wa Halmashauri ya Wilaya ya Bagamoyo, kuwatembelea wanavikundi waliopokea fedha hizo za ruzuku ili kuona kama fedha zilizotolewa zimekwenda kufanya kazi iliyokusudiwa, hivyo akatumia fursa hiyo kuwaasa wanavikundi wanufaika wa fedha hizo kuhakikisha wanakwenda kuzitumia vizuri fedha hizo ili kufikia malengo waliyojiwekea na kwa kufanya hivyo watakuwa wameionesha Serikali kuwa wanaweza kujiimarisha kiuchumi na kupiga hatua kimaendeleo pale wanapowezeshwa.

Mhe. Kawambwa pia ametumia fursa hiyo kuwahamasisha Wananchi wa Bagamoyo, kujiunga katika vikundi vya ujasiriamali vya Wanawake, wenye ulemavu na Vijana katika maeneo yao, na kisha kuwasilisha maombi ya mikopo katika Ofisi ya Mkurugenzi Mtendaji wa Halmashauri ya Wilaya ya Bagamoyo, kwani kuna fursa ya kuwezeshwa mikopo kwa ajili ya kuendeleza shughuli za ujasiriamali wanazofanya.

“Katika Mwaka wa fedha 2019/2020, Halmashauri ya Wilaya ya Bagamoyo, imetenga jumla ya Shilingi Milioni 211,915,000/- toka mapato yake ya ndani kwa ajili ya mikopo kwa Vikundi vya wajasiriamali wanawake, vijana na wenye ulemavu, robo ya fedha hizi hutolewa mara moja kila baada ya miezi 3, na ili mzipate ni lazima muwe mmejiunga katika vikundi vya wajasiriamali. Shime Wanawake, Wenye ulemavu na Vijana wa Bagamoyo, changamkieni fursa hii ya mikopo toka Halmashauri ili mkazitumie katika kuendeleza shughuli zenu za ujasiriamali, mjikwamue kiuchumi na wote kwa pamoja tuliletee Taifa letu maendeleo chanya” Amesema Mhe. Kawambwa.

Nae Mkurugenzi Mtendaji wa Halmashauri ya Wilaya ya Bagamoyo, Bi. Fatuma O. Latu amempongeza Mbunge wa Jimbo la Bagamoyo, Mhe. Shukuru Kawambwa kwa kuiunga mkono Halmashauri katika kuwasaidia Wananchi kujikwamua kiuchumi, lakini pia katika utekelezaji wa miradi ya maendeleo kwani baadhi ya fedha hizo za Mfuko wa Jimbo, pia zimetolewa kwa baadhi ya taasisi za Serikali zinazoendelea na miradi ya Ujenzi, zikiwemo Shule za Msingi, Sekondari na Zahanati.

“Kwa Miaka minne mfululizo Mfuko wa Jimbo la Bagamoyo, umekuwa ukitoa wastani wa Shilingi Milioni 30 kwa taasisi za Serikali na Vikundi vya wajasiriamali wadogo ndani ya Halmashauri, ambazo zimekuwa msaada mkubwa kwetu kama Halmashauri, lakini pia kwa wajasiriamali ambao wamekuwa wakinufaika na fedha hizo wanazopokea ili kuchochea maendeleo ya shughuli zao za Ujasiriamali wanazofanya katika kujikwamua kiuchumi” Amesema Bi. Fatuma.

Wakati huo huo, Mwenyekiti wa Halmashauri ya Wilaya ya Bagamoyo, Mhe. Alli Alli Issa, ametumia fursa hiyo kumpongeza Mbunge wa Jimbo la Bagamoyo, mhe. Shukuru Kawambwa kwa kuwa na moyo wa kujitolea kwani ana hiyari ya kuelekeza fedha hizo katika shughuli zingine, lakini ameona ni vyema kuendelea kuwawezesha wajasiriamali wa Bagamoyo kiuchumi na kwa kufanya hivyo anashiriki kukuza uchumi wa Bagamoyo, na hilo ni jambo la kupigiwa mfano.

Mmoja wa Wanufaika wa ruzuku hiyo ya mfuko wa Jimbo, Mzee Golden Mwenda, toka kikundi cha Unjacha kilichopo Chasimba, Kata ya Yombo, ambao wanajihusisha na kilimo cha muhogo, amepongeza hatua hiyo ya utoaji fedha za ruzuku kwa vikundi vya Wajasiriamali wadogo.

“Nimefarijika sana, hii ni chachu kubwa kwetu, tunamshukuru Mhe. Mbunge wetu wa Jimbo la Bagamoyo, na Serikali kwa ujumla, kwani tunajionea jinsi inavyotujali wazee tusiojiweza, kutuwezesha kujikwamua kiuchumi na kujitegemea, hakika hatujasahaulika, ni faraja kubwa kwetu” Amesema Mzee Mwenda.