MIRADI TISA YA MAENDELEO YAKAGULIWA HALMASHAURI YA WILAYA YA BAGAMOYO

Posted on: September 6th, 2017

Katibu Tawala Msaidizi Mkoa wa Pwani, Ndugu Edward Bruno Mwakipesile jana ameongoza timu ya wataalamu ya Mkoa na Halmashauri kukagua miradi ya maendeleo inayotekelezwa na Halmashauri katika Kata ya Dunda, Mapinga, Kerege, Yombo, Makurunge na Fukayosi.

Miradi hiyo tisa yenye thamani ya Sh. 413,799,263/= ni ya sekta ya Afya, Maji, Elimu Msingi na Sekondari, Utawala na Maendeleo ya jamii na inatekelezwa na Halmashauri ya Wilaya ya Bagamoyo kutokana na fedha za makusanyo ya ndani, Mfuko wa jimbo, Ruzuku ya kata na Vijiji, michango ya Wananchi na Wahisani mbalimbali.

Katika ukaguzi huo Wataalamu walioneshwa kuridhirishwa na ubora wa miradi na thamani halisi ya fedha zilizotumika kutekeleza miradi hiyo ambapo Ndg. Mwakipesile amesema “Natoa pongezi kwa Halmashauri, Wananchi na Wadau mbali mbali wa maendeleo kwa kutoa ushirikiano mzuri katika utekelezaji wa miradi hii, kwani kwa kufanya hivyo huipunguzia serikali mzigo mkubwa na kuiletea jamii maendeleo ya haraka”.

Wakati huo huo kikundi cha kina mama cha Jitegemee Sacoss na kikundi cha Vijana waendesha bodaboda (UWADEPIMASHU) vyote vya Mapinga Wilayani Bagamoyo ambavyo vilitembelewa katika ukaguzi huo vilipongezwa kwa kujiunga pamoja na kufanya shughuli za kujiletea maendeleo na hivyo kuondoa utegemezi kwa kuweza kujiajiri na kupunguza changamoto za ajira Nchini.

Ndugu Mwakipesile pia akatumia fursa hiyo kuwaasa Wananchi ambao ndio wanufaika wakuu wa miradi hiyo ya maendeleo kuithamini na kuilinda ili iweze kuwanufaisha kwa muda mrefu huku akitoa ushauri kwa Wataalamu wa Halmashauri juu ya namna ya  kukabiliana na changamoto mbalimbali zinazotokea wakati wa utekelezaji wa miradi  ikiwemo mwamko mdogo wa wananchi kuchangia shughuli za maendeleo, uharibifu wa miundombinu hasa ya maji na rasilimali fedha.