MIRADI YA MAENDELEO YENYE THAMANI YA BILIONI 10 YATEMBELEWA NA MWENGE WA UHURU BAGAMOYO

Posted on: July 19th, 2018

Mwenge wa Uhuru umemaliza mbio zake katika Halmashauri ya Wilaya ya Bagamoyo mapema leo asubuhi ya tarehe 19 Julai, 2018 ambapo ukiwa Wilayani hapa umeweka mawe ya msingi katika miradi miwil (2) na kutembelea miradi 10, yote ikiwa na thamani ya Shilingi Bilioni 10,863,514,920.04/=

Mkuu wa Wilaya ya Bagamoyo Mhe. Majid Hemed Mwanga ameyasema hayo wakati wa makabidhiano ya Mwenge wa Uhuru kati ya Halmashauri ya Wilaya ya Bagamoyo na Halmashauri ya Kibaha vijijini, yaliyofanyika katika Kijiji cha Miswe Wilayani Kibaha.

Mhe. Mwanga anasema kati ya fedha hizo, Shilingi Milioni 722,167,800/= ni miradi iliyotekelezwa na wajasiriamali wadogo, Milioni 14,116,620.7 ni miradi iliyotekelezwa kwa nguvu za Wananchi, Milioni 667,242,597.9 Wahisani, Bilioni 9,333,936,649.51 miradi iliyotekelezwa kwa fedha toka Serikali kuu, huku Halmashauri ya Wilaya ya Bagamoyo ikichangia kiasi cha Shilingi Milioni 126,051,251.97 katika miradi hiyo ya maendeleo.

Miradi hii toka sekta za Afya, Elimu, Utawala bora, maendeleo ya jamii, miundo mbinu ya barabara, maji na biashara imetekelezwa katika Kata za Kerege, Zinga, Magomeni, Dunda na Yombo ikiwa na lengo la kuboresha utoaji huduma bora kwa jamii hususani katika ya Elimu na Afya.

Aidha, Mhe. Mwanga amesema katika kutekeleza kwa vitendo Kauli mbiu ya Mbio za Mwenge wa Uhuru Mwaka 2018 inayosema “Elimu ni ufunguo wa maisha, wekeza sasa kwa maendeleo ya Taifa letu”, Halmashauri ya Wilaya ya Bagamoyo inaendeleza Ujenzi wa vyumba 86 vya madarasa, ili kupunguza msongamano wa Wanafunzi madarasani, lakini pia, inajenga Shule 8 mpya za Msingi na kuendeleza ujenzi wa maabara 16 katika Shule za Sekondari.

Nae Kiongozi wa mbio za Mwenge wa Uhuru Mwaka 2018, Ndugu Charles Francis Kabeho, ameipongeza Halmashauri ya Wilaya ya Bagamoyo kwa utekelezaji wa mradi bora wa Ujenzi wa Kituo cha Afya Kerege, mradi ulioshika namba moja Nchini katika utekelezaji wa miradi ya ujenzi wa vituo vya Afya unaoendelea katika Halmashauri zote Nchini, kupitia ufadhili wa Benki ya Dunia chini ya Wizara ya Ofisi ya Rais TAMISEMI, na kugharimu jumla ya Shilingi Milioni 500.

“Kituo hiki cha Afya Kerege ni Kituo bora, chenye majengo yaliyojengwa kwa viwango na kimekamilika na kuanza kutoa huduma kwa Wananchi, nawapongeza sana Halmashauri ya Wilaya ya Bagamoyo kwa kusimamia vyema ujenzi wa mradi huu, lakini niiombe Bodi ya dawa Nchini -MSD kuharakisha kukamilisha uletaji wa vifaa tiba katika Kituo hiki cha Afya ili kiweze kuendelea na utoaji huduma kwa ukamilifu wake kama ilivyokususdiwa na Serikali”, Amesema Kabeho.

Mwenge wa Uhuru ukiwa katika Halmashauri ya Wilaya ya Bagamoyo umekimbizwa katika jumla ya Kilomita 169, na umekabidhiwa kwa Halmashauri ya Kibaha Vijijini ambako utakimbizwa Kilomita 69.