MIUNDOMBINU KATA YA MAPINGA YAIMARISHWA

Posted on: December 4th, 2018

Barabara mbili zenye urefu wa km 7.2 zimefanyiwa matengenezo na kuifanya miundombinu hiyo muhimu kwa ajili ya kurahisisha mawasiliano na shughuli za maendeleo katika Kata ya Mapinga kuimarika zaidi.

Bara bara ya kwanza iliyofanyiwa matengenezo ni barabara ya Mapinga – Changwahela yenye urefu wa Kilomita 4.7 na barabara ya pili kufanyiwa matengenezo ni barabara ya Mtambani yenye urefu wa Km 2.5.

Akizungumza namna ambavyo wamefanikiwa kufanya matengenezo hayo ya barabara mbili kwa wakati mmoja, diwani wa Kata ya Mapinga, Mhe. Ibrahim Mbonde amesema, kama Kata wanashirikiana kwa kiasi kikubwa na Wananchi kuhamasishana kuchangia shughuli za maendeleo ndani ya Kata, lakini pia wanawahamasisha wadau wengine wa maendeleo kuwasaidia kulisukuma mbele gurudumu la maendeleo katika Kata yao.

“Tumefanya uhamasishaji na kufanikiwa kupata mfadhili wa ndani ambaye ametusaidia kugharimia uchongaji wa barabara hizi mbili, ambazo sasa zimechongwa na kujazwa kifusi, hivyo kupitika kwa urahisi na kurahisisha mawasiliano katika Kata yetu ya Mapinga tofauti na ilivyokuwa hapo awali kabla hazijafanyiwa matengenezo” Amesema Mhe. Mbonde

Nae Afisa Mtendaji wa Kata ya Mapinga, Ndg. Yoely S. Chumi ameongeza kusema wanamshukuru sana mfadhili aliyejitolea kuwasaidia kufanya matengenezo ya barabara mbili katika Kata ya Mapinga, zilizogharimu jumla ya Shilingi Mil 5 zilizofanya ukarabati sehemu zilizoonekana korofi zaidi, huku matarajio yao kama Kata ni kuendelea na uhamasishaji kwa Wananchi kuendelea kuchangia shughuli za maendeleo ndani ya Kata yao, na watakapofanikiwa wamepanga kuifanyia matengenezo  barabara ya Kimele Mingoi yenye urefu wa Km 1.