MKURUGENZI BAGAMOYO ASIKILIZA KERO ZA WAZEE

Posted on: June 12th, 2018

Wazee takribani 70 toka katika 11 za Halmashauri ya Wilaya ya Bagamoyo, wamepata fursa ya kukaa na Mkurugenzi wa Halmashauri ya Wilaya ya Bagamoyo pamoja na Mhe. Mwenyekiti wa Halmashauri na kuelezea changamoto wanazokumbana nazo katika mkutano maalum uliofanyika katika Ukumbi wa Halmashauri.

Hatua hii imefikiwa na Viongozi hao wa Halmashauri ikiwa ni katika kuhakikisha Wazee ndani ya Halmashauri ya Wilaya ya Bagamoyo wanatambulika na kushirikishwa katika maamuzi muhimu yanayowahusu wao na Halmashauri kwa ujumla.

Wazee hao kupitia mkutano huo pia walipata fursa ya kuelezea changamoto kadha wa kadha wanazokutana nazo katika maisha yao ya kila siku na kupendekeza namna bora ya Serikali kuzitatua changamoto hizo.

Bibi. Rehema Juma (67) toka Kata ya Kerege akizungumza katika mkutano huo amesema, Wazee wamekuwa wakinyanyaswa na kudharaulika kila wanapokwenda katika Zahanati, Vituo vya afya na Hospitali kupata huduma za afya kwani bado kuna wahudumu wa Afya wenye lugha za kukatisha tamaa kwa Wazee, hivyo ofisi ya Mkurugenzi ifuatilie na kuona namna ya kuwashughulikia wahudumu wa Afya wanaonyanyasa Wazee wanapokwenda kupata huduma katika vituo hivyo.

Nae Mzee Alphonce Peter Mwandemo (64) toka Kata ya Magomeni, nae akaongeza kuwa ni vyema mchakato wa uundaji wa mabaraza ya Wazee ya Kata ukaharakishwa na kusimamiwa ipasavyo na Watendaji wa Kata ili kuhakikisha mabaraza hayo yanaundwa na yanaanza kufanya kazi haraka iwezekanavyo ili Wazee wawe na sehemu sahihi ya kuzungumzia changamoto zao ili Halmashauri na Serikali kwa ujumla izifahamu na kutengeneza utaratibu maalum wa kuzitatua kwa haraka na kwa wakati.

Hali kadhalika, Mzee Charles Gideon (58) kutoka Kata ya Mapinga, yeye akashauri kuwa, Wazee ambao bado wana uwezo wa kujishughulisha na kujiingizia kipato wawezeshwe kupata mitaji ili wawekeze katika shughuli za kuwaingizia kipato kitakachowawezesha kuendesha maisha yao na kuweza kupata mahitaji yao muhimu ya kila siku.

Pia Bibi. Ellen Majiba (72) toka Kata ya Zinga yeye akawashauri Wazee wenzake kuishi kwa upendo na kusaidiana hasa pale mmoja wao anapokuwa na shida kama kukosa chakula, mavazi ama malazi, wajaliane wao kwa wao, waoneane huruma na wasaidiane kwa wale wasiojiweza kwani umoja ni nguvu na utengano niudhaifu.

Akizungumza na Wazee hao, Mwenyekiti wa Halmashauri ya Wilaya ya Bagamoyo, Mhe. Alli Alli Issa amesema, kikao hicho cha Wazee ni mwanzo tu, kwani yeye na Mkurugenzi wa Halmashauri wataendelea na utaratibu huo wa kukaa na Wazee, kuwatambua na kuwaunga mkono na kuwasikiliza kwani Wazee ni hazina isiyokauka na rasilimali muhimu kwa maendeleo ya Halmashauri na Taifa kwa ujumla.

Nae Mkurugenzi wa Halmashauri Bi. Fatuma Latu amewatia moyo Wazee hao kuwa Serikali ya Awamu ya tano ni Serikali Sikivu, ya wanyonge, yenye huruma kwa Wazee, Wakina mama, watoto na wasiojiweza hivyo Halmashauri itahakikisha inazishughulikia changamoto zote zilizotajwa ili Wazee ndani ya Halmashauri ya Bagamoyo waishi kwa Amani na kufurahia uzee wao.

Mkurugenzi anasema, “Tunaendelea kuboresha huduma katika hospitali ya wilaya, tumenunua mashuka zaidi ya 600 hapo kabla baadhi ya wagonjwa walikuwa wanalala bila shuka, lakini pia kupitia ofisi ya Ustawi wa jamii tutahakikisha tunapita katika mabaraza ya Wazee ya Kata yanayoendelea kuundwa katika Kata zote hivi sasa, ili kutoa elimu ya namna ya kuenenda katika mabaraza hayo. Msivunjike moyo, Hata wahudumu wa Afya katika Vituo vyetu vya Afya pia tutahakikisha tunawaboresha ili muanze kupata huduma mnazostahili bila kubughudhiwa”

Akaongeza, tutaendelea kujifunza kwa wenzetu kwa maana ya Halmashauri zingine zinazofanya vizuri katika utoaji huduma bora kwa wazee hasa katika sekta ya Afya ili na sisi tusibaki nyuma katika kuhudumia wazee wa Halmashauri ya Wilaya ya Bagamoyo, Anasema Mkurugenzi.

Bi. Latu akahitimisha kwa kuwanasibu Wazee hao wa Bagamoyo ambao bado wanamiliki ardhi, kutouza maeneo yao yote wakayamaliza, kwani watakosa maeneo ya kulima na kuzalisha malighafi kwa ajili ya viwanda vinavyoendelea kujengwa ndani ya Halmashauri ya Bagamoyo, na hivyo kupelekea kukosa kunufaika na Tanzania ya viwanda ijayo.