MOTO WATEKETEZA MELI BAGAMOYO

Posted on: August 14th, 2018

Meli kubwa ya mizigo iitwayo MV RAHIMA (LAND CRAFT RAHIMA) imeungua moto kwa asilimia 20% mapema leo asubuhi ya Tarehe 14/08/2018 katika bandari ya Bagamoyo.
Meli hiyo inayomilikiwa na Ndg. Hamis Rashid mkazi wa Unguja ilikua ikiongozwa na Kapteni Abdulrahman Abdulaziz ambaye pia ni Mkazi wa Unguja na ina uwezo wa kubeba mzigo wenye ukubwa wa Tani 500 kwa mara moja.
MV RAHIMA imekaa kwa muda wa wiki moja katika Bandari ya Bagamoyo ikisubiri kupakia mzigo wa Saruji wa Tani 300 na ndani ya Meli kulikua na jumla ya watu 16 ambao ni mabaharia na wafanyakazi wengine wa Meli.
Kwa mujibu wa Kapteni wa Meli hiyo Bw. Abdulrahman Abdulaziz ni hitilafu ya umeme na anaongeza kusema, “Mlango wa mbele wa Meli ulikua umeharibika, hivyo Alfajiri ya Tarehe 14 Agosti, 2018, tuliamkia kuutengeneza kwa kuuchomelea tayari kwa kujiandaa kupokea mzigo na kuanza safari ya kurudi Unguja” Anasema Bw. Abdulrahman.
Anaongeza, Wakati tunatengeneza mlango huo, ghafla tuliona moshi mkubwa eneo analokaa kapteni wa Meli kuongoza Meli, na hivyo kutulazimu kusitisha zoezi la kuchomelea mlango na kwenda kuangalia sababu ya Moshi huo, ambapo tulikuta eneo la chumba cha kapteni likungua moto uliosababishwa na hitilafu ya Umeme.
Bw. Abdulrahman anabainisha kuwa, Moto huo ulianzia katika chumba cha kepteni wa Meli mnamo saa 11:45 Asubuhi na taarifa zilifika kituoni katika Jeshi la Zimamoto saa 12:25, Zimamoto walifika eneo la tukio saa   12:30 na walifanikiwa kuzima kabisa moto mnamo saa 1:30 Asubuhi.
Anaongeza, eneo ambalo moto umetokea lina vyumba sita vya abiria ambavyo vyote vimeungua, na wakati moto unaanza kulikua na mabaharia wawili vyumbani wamelala lakini wote wametoka salama.
Vitu ambavyo wamepoteza kutokana na moto huo ni pamoja na nguo, Fedha, Vitanda pia Vifaa vya kuongozea meli vyote vimeungua hata hivyo hakuna taarifa ya Kifo wala majeruhi aliyeripotiwa katika ajali ya hiyo.
Meli ya MV RAHIMA imesajiliwa huko visiwani Zanzibar na ina vibali vyote vya usajili ambavyo vyote vimeungua moto katika ajali hiyo, hata hivyo, hajui Meli hiyo ilisajiliwa Mwaka gani ila imefanyiwa ukaguzi Mwaka huu huko Pemba lakini anakiri kuwa hajui ni lini hasa imefanyiwa ukaguzi huo kwa maana ya Tarehe na Mwezi na pia Mamlaka iliyokagua meli hiyo pia haifahamu.
Nae Kamanda wa Zimamoto Wilaya ya Bagamoyo, Bw. Hiward Mwanza baada ya ukaguzi wa Meli hiyo anabainisha yafuatayo kuwa, Meli hiyo ina vizimia moto vitatu vikuu kuu ambavyo vinaonesha vinatakiwa kufanyiwa tena ukarabati Januari 2019
Anaongeza, Meli ina mfumo wa kuzimia moto lakini Kapteni anasema mfumo huo haufanyi kazi, Meli haina Mlango wa dharura wa kutokea nje inapotokea ajali au hatari, pia haina alama za zinazoonesha dharura mfano Emergency Exit, Mfumo wa utoaji maji kwenye Meli umeoza na mabaharia hawana mafunzo ya kujikinga na moto pia Meli haina vifaa vya zimamoto
Meli ya MV RAHIMA, Meli hii huja Bagamoyo mara mbili kwa Mwezi kuchukua Saruji, na kila mara inapokuja Bandari ya Bagamoyo hubeba Tani 300 – 500 za Saruji.