PERI URBAN YAWAKA BAGAMOYO

Posted on: August 7th, 2019

Naibu Waziri wa Nishati, Subira Hamisi Mgalu,amezindua Mradi wa Usambazaji Umeme katika Vijiji vilivyopo Pembezoni mwa Miji (Peri-Urban Rural Electrification Program) wilayani Bagamoyo ikiwa ni muendelezo wa uzinduzi wa miradi hiyo nchi nzima.

Akizungumza wakati wa uzinduzi huo, Naibu waziri huyo wa Nishati amesema lengo la serikali ni kuwasha umeme katika vijiji 10,278 ifikapo mwezi Juni 2020, ambapo mpaka sasa vijiji 7,349 tayari vimeshaunganishwa umeme.

Alisema katika mradi huo wanachi elfu sita wa awali wataunganishiwa umeme katika maeneo mbalimbali ikiwemo Kata za Magomeni, Kerege, Zinga, Kiromo Mapinga na vitongoji vyake katika Halmashauri ya Bagamoyo.

Aliongeza kwa kusema kuwa, hayo yote yanatekelezwa kutokana na uongozi mzuri wa Rais wa jamhuri ya Muungano wa Tanzania, Dkt. John Magufuli, kusimamia ukusanyaji wa kodi ili fedha zielekezwe kwenye miradi ya maendeleo kama hiyo.

Naibu waziri huyo wa Nishati ametumia nafasi hiyo kuwaagiza wakandarasi na wasambazaji na wazalishaji  wa vifaa vinavyotumika kwenye miradi ya umeme kuzalisha vifaa vyenye ubora ili miradi inayojengwa iwe ya kudumu.

Aidha, alisema wakandarasi wanapaswa kutumia vifaa vinavyozalishwa na kampuni za ndani ili kuongeza pato la ndani kutokana na kodi za wenye viwanda hivyo.

Nao wasambazaji wa vifaa hivyo wametakiwa kuacha urasimu na badala yake wafanye kazi kwa kuzingatia weledi wa kazi yao kulingana na mahitaji ya wakandarasi ili vifaa viwafikie wakandarasi kwa wakati nao waweze kutekeleza miradi ndani ya kipindi cha mikataba yao.

Alitoa onyo kwa yeyote atakaejaribu kumkwamisha mkandarasi, kuwa hatua hiyo ni kukwamisha juhudi za wizara, na ukiikwamisha wizara umemkwamisha Rais wa Jamuri ya Muungano wa Tanzania na kwamba utakuwa ni miongoni mwa wanaorudisha maendeleo nyuma na serikali haitokuvumilia.

Awali akizungumza mbele ya Naibu waziri, Kaimu Mkurugenzi Mkuu, Wakala wa Nishati Vijijini (REA) Mhandisi, Amos Maganga, amesema mradi huo utagharimu shilingi Bilioni 12 . 8 utakapokamilika.

Nae Mbunge jimbo la Bagamoyo, Dkt. Shukuru Kawambwa, amesema anamshukuru Rais Dkt. Magufuli kwa kutekeleza miradi mbalimbali ikiwemo mradi huo ndani ya jimbo lake.

Aidha, amempongeza waziri wa Nishati Medard Kalemani pamoja na Naibu waziri Subira Mgalu kwa kazi kubwa wanayofanya ya kusimamia vyema miradi ili itekelezwe ndani ya wakati.