SAMIA AAHIDI KERO ZA WANANCHI WA PANDE KUSHUGHULIKIWA

Posted on: October 24th, 2018

Wakazi wa Kitongoji cha Pande, wilayani Bagamoyo mkoani Pwani ambao wamehamishwa kupisha mradi wa ujenzi wa bandari mpya ya Bagamoyo wameiomba serikali kuwasaidia kulipwa fidia na kuhamishiwa katika makazi mapya ya Kidagoni na Kitopeni kama walivyoaihidiwa na Serikali wakati wanakubaliana kupisha maeneo hayo kwa ajili ya utekelezaji wa mradi.

Akitoa kilio hicho kwa niaba ya wakazi wa maeneo hayo, wakati wa Ziara maalumu ya Makamu wa Rais wa Jamuhuri ya Muungano wa Tanzania Mhe: Samia Suluhu Hassan, alipotembelea na kukagua  eneo la mradi wa ujenzi wa bandari mpya ya Bagamoyo katika eneo la Mbegani mapema leo, Mwenyekiti wa kitongoji cha Pande Muhsin Mneka alisema  walipangiwa kwenda eneo la Kitopeni na Kidagoni lakini wameshindwa kwenda kutokana fidia kutokamilika na baadhi yao kutolipwa kabisa.

“Wapo wenzetu hapa waliolipwa hapa hadi laki moja, milioni tano na milioni moja kiasi ambacho hakikidhi Mwananchi kuondoka na kuhamia katika makazi mapya, japo hatujakataa kupisha mradi ila makubaliano yetu hayajatekelezwa, kwani EPZA na sisi tulikubaliana kwa maandishi kuwa tutaondoka katika maeneo yetu haya na wao kiutapatia maeneo mbadala ya Kidagoni na Kitopeni" Alisema Mneka.

Kwa upande wake mbunge wa Jimbo la Bagamoyo Dk Shukuru Kawambwa alisema kuwa Kijiji hicho kina Jumla ya Kaya 2,200 sawa na watu 16,500 ambao wanatakiwa kuhama katika eneo hilo kupisha ujenzi wa bandari mpya ya Bagamoyo lakini Wananchi hao.wamekumbwa na changamoto kubwa ya kupunjwa ama kutolipwa kabisa fidia zao hivyo kuna haja ya kuhakikisha suala hilo linafikia mwisho.

"Naiomba Serikali kupitia Mhe. Makamu wa Rais kututazama kwa jicho la huruma kuhakikisha Wananchi hawa wa Kitongoji cha Pande wanapata haki zao, lakini pia tunaiomba sana Serikali tukufu ya Mhe Rais wa Jamuhuri ya Muungano wa Tanzania, Mhe: Dkt. John Joseph Pombe Magufuli kuharakisha utekelezaji wa mradi huu kwani muda umekwenda sana tangu jiwe la Msingi la ujenzi wa Bandari hii lilipowekwa Mwezi Oktoba, 2015 na Rais Mstaafu wa awamu ya nne, Mhe. Jakaya Kikwete, tunaiomba sana Serikali ianze utekelezaji wa mradi huu wa bandari ya Bagamoyo ambayo itakuwa ndio bandari kubwa zaidi kuliko zote katika Pwani ya Afrika Mashariki, na tunaamini bandari hii itasaidia kukuza uchumi wa wana Bagamoyo na Taifa la Tanzania kwa ujumla". Alisema Mhe. Kawambwa

Akijibu hoja hizo, Makamu wa Rais wa Jamuhuri ya Muungano wa Tanzania, Mhe: Samia Suluhu Hassan alisema , suala hilo amelichukua na atalipeleka kwa Rais baada ya kukaa na mamlaka husika ,wizara ya ardhi, bandari na EPZA ili kulipatia ufumbuzi. na kuongeza kwamba malalamiko yote yatafanyiwa kazi na Serikali kamwe haitamdhulumu Mwananchi yeyote haki yake.

Akaongeza, "Nimesikia kuna watu takribani 600 ambao wakati wa malipo ya fidia ya watu wa Pande, walifika na kufanya udanganyifu na kuiibia Serikali kwa kupokea fidia za watu wa Pande ili hali wao si wakazi wa Kitongoji hiki na watu hawa mnawafahamu, lakini mliwaficha, mlikaa kimya na watu hao wakafanikiwa kuiibia Serikali fedha hizo, mlikosea sana kukaa kimya na kutowaripoti katika vyombo vya Ulinzi na Usalama ili washughulikiwe, na yamkini fedha hizo walizolipwa ndio ambazo mngelipwa ninyi wakazi halali wa Pande mnaolia hadi leo kwa kukosa fidia zenu, nichukue fursa hii kukemea kwa nguvu zote tabia hii ya kuficha uovu, lakini kuagiza vyombo vya Ulinzi na usalama kuhakikisha watu hao walioiibia Serikali wanatafutwa kokote walipo na kuhakikisha wanarudisha fedha hizo na kuchukuliwa hatua za kisheria" Alisema Mhe. Samia.

Makamu wa Rais wa Jamuhuri ya Muungano wa Tanzania, Mhe: Samia Suluhu Hassan, yupo katika Ziara maalum ya kikazi ya siku tano Mkoani Pwani, akitembelea na kukagua shughuli mbalimbali za maendeleo Mkoani humo, Ziara iliyoanzia Wilayani Bagamoyo siku ya Tarehe 24 Oktoba, 2018