SERIKALI YATOA PIKIPIKI 11 KUBORESHA SEKTA YA ELIMU BAGAMOYO

Posted on: October 5th, 2018

Serikali Kuu kupitia Wizara ya Elimu na Mafunzo ya ufundi imetoa pikipiki 11 aina ya Honda kwa waratibu elimu Kata wa Halmashauri ya Wilaya ya Bagamoyo ili kuboresha sekta ya Elimu Wilayani humo.

Akizungumza katika hafla fupi ya makabidhiano ya pikipiki hizo, yaliyofanyika leo tarehe 05 Oktoba, 2018 katika Ofisi za Halmashauri ya Wilaya ya Bagamoyo, Mkuu wa Wilaya ya Bagamoyo Mhe. Zainab Kawawa amewataka waratibu elimu Kata katika Halmashauri ya Wilaya ya Bagamoyo, kuhakikisha wanazitumia pikipiki walizopatiwa kuhakikisha wanainua kiwango cha ufaulu wa Wanafunzi Wilayani humo kwa kuongeza ufuatiliaji na kutia msukumo zaidi wa masuala ya elimu katika Kata zao.

 “Sitegemei kukuta pikipiki hizi zinatumika kufanyia biashara ya boda boda ama kutumika kwa namna yoyote tofauti na malengo ya Serikali ya kuwapatia vyombo hivi vya usafiri. Nategemea mkazitumie Pikipiki hizi kwa uadilifu, kwani mmeaminiwa na kupewa dhamana kubwa ya kuhakikisha mnaboresha na kuinua kiwango cha ufaulu kwa kuongeza nguvu ya ufuatiliaji masuala ya elimu katika Kata zenu” Ansema Mhe. Zainab

Nae Mwenyekiti wa Halmashauri, Mhe. Alli Alli Issa akizungumza katika makabidhiano hayo ameishukuru Serikali kwa kutoa msaada huo mkubwa wenye lengo la kuhakikisha inapandisha na kuboresha kiwango cha elimu Nchini.

“Hii ni mara ya pili Serikali Kuu inatuwezesha kuwapatia pikipiki waratibu elimu Kata katika Halmashauri yetu, kwa mara ya kwanza jambo hili lilifanyika miaka mitano iliyopita. Tunatoa shukrani zetu za dhati kwa Serikali kuu kupitia Wizara aya Elimu namafunzo ya ufundi kwa msaada huu na Uongozi wa Halmashauri utahakikisha unawasimamia na unawafuatilia waratibu elimu Kata hawa katika utendaji kazi wao baada ya kuwezeshwa vitendea kazi hivi, hususani kuhakikisha wanazifikia shule zinazowahudumia Wanafunzi wenye uhitaji maalumu na Shule zilizo pembezoni” Anasema Mhe. Mwenyekiti.

Akizungumza kwa niaba ya waratibu elimu Kata wa Halamshauri ya Wilaya ya Bagamoyo, Bw. Hashim Issa Mratibu elimu Kata wa Kata ya Nia njema, amesema wamefurahi sana kuwezeshwa vitendea kazi hivyo, watahakikisha wanavitunza na wapo tayari kuvitumia kwa malengo yaliyowekwa na Serikali ili kuinua na kuboresha sekta ya Elimu Wilayani Bagamoyo.