SI KILA HOMA NI MALARIA

Posted on: April 26th, 2019

Hayo yamesemwa na Mgeni rasmi, Mtendaji Mkuu wa Mji mdogo wa Bagamoyo, Ndg. Athumani Stili, alipomwakilisha Mkuu wa Wilaya ya Bagamoyo Mhe. Zainab Kawawa, katika maadhimisho ya Siku ya Malaria Duniani yaliyofanyika tarehe 25 Aprili, 2019

Maadhimisho hayo ambayo kwa Halmashauri ya Wilaya ya Bagamoyo yamefanyika katika Uwanja wa Shule ya Msingi Majengo iliyopo katika Kata ya Magomeni, yamefanyika kwa ushirikiano baina ya Hospitali ya Wilaya ya Bagamoyo na Taasisi ya uchunguzi ya Ifakara Health Institute (ihi) ambapo wataalamu wa Afya toka vituo hivyo viwili walishirikiana kutoa huduma za upimaji wa ugonjwa wa malaria na matibabu kwa wananchi waliokutwa na ugonjwa huo, upimaji wa shinikizo la damu, upimaji wa maambukizi ya virusi vya UKIMWI na huduma ya ushauri nasaha.

Akizungumza kwa niaba ya Mhe. Mkuu wa Wilaya ya Bagamoyo ambaye alikuwa mgeni rasmi katika maadhimisho hayo, Ndg. Stili amesema, Wananchi wengi wamejijengea utamaduni wa kutumia dawa za malaria kila wanapopatwa na homa, kitu ambacho si sahihi kwani Si kila Homa ni Malaria.

“Nawasihi Wananchi wa Bagamoyo kuhakikisha kabla ya kutumia dawa za Malaria, wawe wamefika katika Vituo vya kutolea huduma za Afya, waonane na Wataalamu wa Afya na kupima, ili wapatiwe matibabu sahihi pale wanapopatwa na ugonjwa wa homa, kwani Si kila Homa ni Malaria, na matumizi mabaya ya dawa za malaria yanaweza kutengeneza usugu hivyo kupelekea mwili kushindwa kupokea matibabu ya malaria badae mwili unapohitaji matibabu hayo” Amesema Ndg. Stili.

Akaongeza, Ni vyema unaposikia dalili za malaria kuwahi mara moja katika Kituo cha kutolea huduma za Afya, ili upate matibabu stahili badala ya kukimbilia tu kununua dawa na kutumia au kutumia dawa za asili ambazo hazijathibitishwa kisayansi na Wataalamu wa Afya, kwani kwa kufanya hivi unaweza kupoteza maisha maana Malaria inaua.

Takwimu za ugonjwa wa Malaria Wilayani Bagamoyo, kwa mujibu wa mratibu wa ugonjwa wa malaria Wilayani Bagamoyo, Dkt. Zena Mtajuka zinaonesha kuwa kwa mwaka 2018 kati ya wagonjwa wote waliopatiwa matibabu kupitia kitengo cha wagonjwa wa nje yaani (OPD), 5% ya wagonjwa hao walikutwa na ugonjwa wa Malaria na walipatiwa matibabu ya ugonjwa huo.

Dkt. Zena pia amesema kupitia taarifa yake aliyoisoma mbele ya Mgeni rasmi kuwa, Halmashauri imejipanga kuhakikisha upatikanaji wa matibabu sahihi ya ugonjwa wa malaria katika vituo vyote 27 vya kutolea huduma za Afya vilivyopo ndani ya Halmashauri, pia utoaji wa Vyandarua vyenye dawa ya kuzuia mbu waenezao malaria kwa wajawazito na watoto walio chini ya mwaka mmoja mara tu wanapoanza mahudhurio ya kliniki ya mama na mtoto.

Siku ya malaria Duniani huadhimishwa tarehe 25 Aprili kila Mwaka na kwa Mwaka huu maadhimisho haya yalibebwa na kauli mbiu isemayo “Zero Malaria inaanza na Mimi”