Simbachawene ahimiza shughuli za Nanenane kuwa endelevu .

Posted on: August 8th, 2022

Waziri wa Nchi,Ofisi ya Waziri Mkuu,Sera,Uratibu na Bunge,Mheshimiwa George Simbachawene ameagiza shughuli za maonesho zinaofanyika katika viwanja vya Nanenane ziwe endelevu kwa mwaka mzima ili kufanya eneo hilo kuwa kitovu cha teknolojia katika sekta ya kilimo,Mifugo na Uvuvi na wananchi kuweza kupata mafuzo muda wote.

Waziri Simbachawene ametoa agizo hilo leo Agosti 8 mwaka juu wakati akifunga maonesho ya wakulima maarufu kama Nanenane kanda ya mashariki yaliyofanyika katika viwanja vya Mwalimu Julius Kambarage Nyerere vilivyopo Nanenane katika Manispaa ya Morogoro.

Akizungumza kwa niaba ya Makamu wa Pili wa Rais wa Serikali ya Mapinduzi ya Zanzibar Mhe.Hemed Suleiman Abdula kwenye maonesho hayo ya nanenane kanda ya mashariki inayojumuisha mikoa ya Pwani,Tanga,Morogoro na Dar es Salaam,Waziri Simbachawene ametoa wito wa kusambaza kwa wananchi teknolojia mpya za kilimo,mifugo na uvuvi ili kukuza uchumi wao huku akitaka shughuli hizo kuwa endelevu kwa mwaka mzima,katika hatua nyingine Waziri Simbachawene amewataka viongozi wa ngazi mbalimbali katika mikoa hiyo minne kutekeleza maagizo ya viongozi wote waliotembelea maonesho ya mwaka huu waliyoyatoa wakati wakitembelea maonesho hayo.’’Najua viongozi mbalimbali wamepita na kukagua maonesho haya hivyo, ni rai yangu kuwa yale yote amabayo wezangu waliagiza lazima tutafakari na kuyafanyia kazi ili kuleta mapinduzi katika kilimo na ufugaji’’ alisema Mhe.Waziri.

Kwa upande wake Naibu Waziri wa Wizara ya Kilimo Antony Mavunde ametumia fursa hiyo kumshukuru Rais wa Jamhuri ya Muungano wa Tanzania,Mhe. Samia Suluhu Hassan kwa kuongeza bajeti ya wizara ya Kilimo kutoka shilingi bilioni 254 kwa mwaka wa fedha 2021/2022 hadi bilioni 954 kwa mwaka 2022/2023.