SIMU ZA MKONONI KUTUMIKA KUTOLEA HUDUMA ZA UGANI BAGAMOYO

Posted on: June 19th, 2020

Wakulima waliojikita katika uzalishaji wa mazao ya kilimo wakitumia njia ya kilimo hai ‘organic farming’, wamepatiwa simu za mkononi 11 ili kurahisisha utoaji huduma za ugani kwa wakulima hao

Wakulima hao wapatao 15 katika Kata za Kiromo na Yombo Wilayani hapa, wamepatiwa msaada huo hapo jana kutoka Wizara ya Kilimo Nchini kupitia mradi wa kilimo hai unaofadhiliwa na Benki ya Dunia

Mratibu wa mazao ya mizizi Wilaya ya Bagamoyo Ndg. Hamza Suleiman akizungumza baada ya makabidhiano hayo amesema simu hizo zimewekewa mfumo maalum unaowawezesha wakulima kupiga picha za mazao yao yakiwa shambani na kutuma picha hizo kwa Maafisa Ugani Wilayani kisha Maafisa ugani kupata fursa ya kuwashauri nini cha kufanya kulingana na uhitaji utakaoonekana kwa wakati huo, lengo likiwa ni kuona mkulima anatumia rasilimali zinazomzunguka katika kuongeza uzalishaji, kuboresha Afya ya jamii, udongo, na viumbe hai vilivyopo kwenye udongo

Anaongeza, “simu hizi pia zitawasaidia wakulima hawa, kutuma picha za mazao waliyovuna kisha Ofisi ya Kilimo Wilaya tunawasaidia kuwatafutia masoko lakini pia simu hizi ni zitawasaidia wakulima wote wanaofanya kilimo hai, katika Kata hizi za Kiromo na Yombo, kwani aliyekabidhiwa simu ana wajibu wa kuhakikisha anawahudumia wakulima wenzake wote katika eneo alilopo na kuwasaidia kutuma changamoto wanazokutana nazo kwa Wataalam wa Wilaya ili wafike kuwasaidia ama kuwasaidia kutatua changamoto hizo kwa njia ya simu pia kama ni tatizo linalohitaji uharaka zaidi”

Baadhi ya wakulima katika Kata za Kiromo na Yombo, wamekuwa wakitekeleza miradi maalum ya kilimo hai kinachowalazimu, kutotumia kabisa mbolea na madawa ya kisasa yenye kemikali ambapo wamejikita kulima mazao ya mihogo, mahindi, mpunga na mboga mboga ambayo yameonesha mafanikio makubwa na kuwaongezea ari ya kuendelea kufanya kilimo hai katika maeneo yao