TANZANIA BILA MAGONJWA YA MLIPUKO INAWEZEKANA

Posted on: July 29th, 2020

Wananchi katika Halmashauri ya Wilaya ya Bagamoyo, wametakiwa kuendelea kuchukua tahadhari dhidi ya magonjwa ya mlipuko kwa kuhakikisha wanazingatia kanuni za Afya ikiwemo kunawa mikono mara kwa mara kwa maji tiririka na sabuni pia kutumia vitakasa mikono.

Timu kutoka kitengo cha Elimu ya Afya kwa umma cha Wizara ya Afya wakishirikiana na wataalam wa Mkoa na Shirika la Red Cross Tanzania wapo katika kampeni maalum ya kuelimisha umma juu ya masuala ya Afya, hususani wananchi kujiunga na mfuko wa Afya ya jamii yaani CHF iliyoboreshwa, kuzingatia lishe bora, umuhimu wa kuhudhuria kliniki ya mama na mtoto katika vituo vya kutolea huduma za Afya na uchukuaji tahadhari juu ya magonjwa ya mlipuko kama kuhara na kipindu pindu.

Afisa muelimishaji kutoka Ofisi ya Mkuu wa Mkoa wa Pwani, Ndg. David Muya, akizungumza na walimu na wanafunzi takribani 2378 wakati wa uzinduzi wa kampeni hiyo Wilayani hapa, katika Shule ya Msingi Majengo na Jitegemee zilizopo katika Kata ya Magomeni, amesema, ni muhimu wazazi, walimu, wanafunzi na jamii nzima inashiriki kikamilifu kutokomeza magonjwa ya mlipuko kama ilivyofanya kwa mlipuko wa ugonjwa wa corona uliotokea hapa Nchini, miezi minne iliyopita kwa kuendelea kuchukua tahadhari zile zile za kunawa mikono kwa maji tiririka na sabuni, pia kutumia vitakasa mikono.

“Ninyi ni wajumbe wazuri, tumefika hapa leo ili mtusaidie kufikisha ujumbe huu kwa wazazi na walezi mtakaporudi majumbani, tumeishinda corona kwa kuzingatia maelekezo tuliyokuwa tukipewa na wataalam wa Afya, endeleeni kuzingatia maelekezo yale ili kujiepusha magonjwa mengine ya mlipuko ili Tanzania ibaki kuwa salama kwani Tanzania bila magonjwa ya mlipuko inawezekana” Amesema Bw. Muya

Anaongeza, “ili jamii yetu iwe salama, ni muhimu kuzingatia lishe bora wakati wote, wakumbusheni wazazi na walezi kuzingatia upatikanaji wa mlo kamili katika kaya zenu, pia kujiunga katika mfuko wa bima ya afya ya jamii iliyoboreshwa yaani CHF iliyoboreshwa ili kupata uhakika wa matibabu pale mmoja wa wanafamilia atakapohitaji huduma za Kiafya, bima hii inapatikana katika Ofisi za Vitongoji mnavyoishi kwa gharama ya Shilingi 30,000/- tu, ambapo wanafamilia 06 watanufaika na huduma hii ya bima ya Afya kuanzia ngazi ya Zahanati, Vituo vya Afya, Hospitali ya Wilaya na hata Hospitali ya rufaa ya Mkoa wa Pwani”

Kampeni hii inaendeshwa kwa muda wa siku tatu ambapo imeanza leo tarehe 29 Julai 2020 na itakamilika tarehe 31 Julai, 2020 ikitarajiwa kuzifikia Kata zote 11 za Halmashauri ya Wilaya ya Bagamoyo, ambapo siku ya leo kampeni imefanyika katika Kata za Magomeni, Kisutu, Nia njema na Dunda elimu ya Afya Kinga imetolewa katika makundi ya watu mbali mbali katika maeneo hayo, hususani maeneo yenye mikusanyiko ya watu, Shuleni, Vyuoni, viwandani na kwenye masoko.