TATHIMINI YA WEPMO KUELEKEA SIKU YA KUNAWA MIKONO DUNIANI TAREHE 15 OKTOBA, 2018

Posted on: October 8th, 2018

Kuelekea kuadhimisha kilele cha siku ya Unawaji mikono Duniani, ambayo hufanyika kila Mwaka ifikapo tarehe 15 Oktoba, Wananchi katika Halmashauri ya Wilaya ya Bagamoyo wamehimizwa kujenga tabia ya kunawa mikono kila mara na kuwa na vifaa vya unawaji mikono kando ya vyoo vyao ili kujiepusha na magonjwa yanayotokana na uchafu wa kutokunawa mikono baada ya kutoka chooni.

Wito huo umetolewa na Meneja mradi wa Shirika la Water and Environmental Sanitation Project Maintanance Organization (WEPMO) Tanzania, Bw. Renatus Rweyemamu, linalotekeleza mradi wa uboreshaji Afya na Usafi wa mazingira katika Halmashauri ya Wilaya ya Bagamoyo, alipokuwa akitoa tathmini ya utekelezaji wa mradi huo kuelekea maadhimisho ya kilele cha siku ya unawaji mikono Duniani.

Meneja mradi huyo anatanabaisha kuwa tarehe 18 -20 Septemba, 2018 wamefanya ufuatiliaji katika Kata ya Makurunge Wilayani Bagamoyo kuona muitikio wa uhamasishaji walioufanya juu ya ujenzi wa vyoo bora na uwekaji wa vinawia mikono katika kila Kaya ambapo Wananchi wameonesha muitikio chanya wa kujenga vyoo bora vya kudumu na kuweka vinawia mikono katika Kaya zao.

Nae Afisa Afya toka Kata ya Makurunge katika Halmashauri Wilaya ya Bagamoyo Ndg. Ludamila Mgalula, amesema utekelezaji wa mradi wa uboreshaji  afya na usafi wa Mazingira chini ya Shirika la WEPMO- Tanzania, katika Halmashauri ya Wilaya ya Bagamoyo umekuwa ni msaada mkubwa kwani wamesaidia kuhamasisha jamii  juu ya ujenzi wa vyoo bora na uwekaji wa vinawia mikono lakini pia kuhakikisha kuwa unawaji mikono baada ya kutoka chooni unazingatiwa.

Anaongeza “Nashukuru sana Shirika la WEPMO- Tanzania kwa kusaidia zoezi la uhamasishaji na ufuatilaji wa kuhakikisha kuwa kila Kaya inakuwa na choo bora chenye kifaa cha kunawia mikono katika Kata ya Makurunge na nawaahidi kwamba, Kata itahakikisha inaendeleza juhudi za uhamasishaji na ufuatiliaji kupitia sheria ndogondogo za kata na mabaraza ya kata kutoa adhabu kwa watu wote watakaokiuka kanuni bora za afya”. Anasema Bw. Mgalula

Utafiti wa awali uliofanywa na shirika WEPMO katika Kata 11 za Halmashauri ya Wilaya ya Bagamoyo unaonesha kuwa ni 23% tu ya Kaya katika Halmashauri ya Wilaya ya Bagamoyo wana vifaa vya kunawia mikono nje ya vyoo vyao.  

Aidha Afisa mradi toka Shirika la WEPMO Bw. Denis Mkani amesema wamefanya uhamasishaji kwa muda wa miezi minne katika Kata 11 za Halmashauri juu ya ujenzi wa vyoo bora vinavyoambatana na vinawia mikono katika kila Kata na Wananchi wameonesha kubadilika kwa kiasi kikubwa.

Bw. Mkani pia ametoa wito kwa Wananchi wote wa Halmashauri ya Wilaya ya Bagamoyo kujenga tabia ya kunawa mikono mara watokapo chooni, kabla ya kula pia baada ya kutoka kwenye shughuli mbalimbali na kusisitiza matumizi bora ya vyoo kwa kuzingatia usafi ili kujiepusha na magonjwa yanayotokana na kutozingatia kanuni bora za afya, kwani suala la afya na usafi wa mazingira ni jukumu la kila mtu na kwa kushirikiana Halmashauri, uhamasishaji utaendelea kufanyika ili kuhakikisha kiwango kinaongezeka cha kaya zenye vifaa vya kunawa mikono na zinazingatia unawaji mikono na kanuni nyingine za afya.

Mradi wa uboreshaji Afya na usafi wa mazingira unatekelezwa na Shirika la WEPMO, linalofadhiliwa na USAID na ni shirika linalofanya kazi ya kuisadia Serikali katika kutekeleza kampeni ya Taifa ya uhamasishaji ujenzi wa vyoo bora maarufu kama ‘USICHUKULIE POA, NYUMBA NI CHOO’ mradi unaotelezwa kwa Mwaka mmoja katika Halmashauri ya Wilaya ya Bagamoyo na utarajiwa kukamilika Mwezi Mei, 2019